پاکستان کی پہچان، مصورِ مشرق ’عبدالرحمٰن چغتائی‘

گھر پیارا گھر
January 17, 2020

ہم اکثر اپنے گھروں، خاص طور پر ڈرائنگ روم کو خوبصورت فن پاروں سے سجاتے ہیں۔ یہ فن پارے بہت قیمتی اور حیرت انگیز خیالات سے بھرپور ہوتے ہیں، ان کے دیرپا رنگوں میںمصور کی ریاضت اور شب و روز کی محنت شامل ہوتی ہے، جو کہ ان کے خیال کو زوال پذیر ہونے نہیں دیتی۔ اگر آپ کو اپنے گھر میں سجی کسی انوکھی اور دلفریب پینٹنگ کے مصور کے بارے میں معلومات ہوں تو آپ فخریہ طور پر اپنے مہمانوں کو اس بارے میں بتاتے ہیں۔ اور جب گھر میں مایہ ناز مصورعبدالرحمٰن چغتائی کی پینٹنگ اپنی بہار دکھارہی ہو تو یہ آپ کیلئے ایک قیمتی اثاثہ ہوتی ہے۔

عبدالرحمٰن چغتائی کسی تعارف کے محتاج نہیں۔ ریڈیو پاکستان اور پاکستان ٹیلی ویژن کے ’لوگو‘ عبدالرحمٰن چغتائی کی ہی اختراع ہیں جبکہ حکومتِ پاکستان کے ابتدائی چار ڈاکٹکٹوں کے ڈیزائن بھی چغتائی کی تخلیقی صلاحیتوں کا منہ بولتا ثبوت ہیں۔

پاکستان کے عظیم مصور عبدالرحمٰن چغتائی نے 21ستمبر 1897ء کو لاہور میںآنکھ کھولی۔ ان کا شجرہ نسب عہد شاہجہانی کے مشہور معمار احمد معمار سے جاملتاہے، جنہوں نے جامع مسجد دہلی، تاج محل (آگرہ) اور لال قلعہ (دہلی) کے نقشے تیار کیے تھے۔ چغتائی نے 1914ء میں میو اسکول آف آرٹس لاہور سے ڈرائنگ کا امتحان امتیازی نمبروں سے پاس کرنے کے بعد استاد میراںبخش سے مصوری کے اسرار ورموز سیکھے اور پھر میو اسکول میںہی تدریس کے پیشے سے منسلک ہو گئے ۔ 1919ء میں جب انہوں نے ہندوستانی مصوری کی ایک نمائش میں شرکت کی تو ان کے جذبہ شوق کو مہمیز ملی اور پھر اپنے اسکول کے پرنسپل سے مشورہ کرکے انہوں نے اپنے فن پارے کلکتہ کے رسالے ’’ماڈرن ریویو‘‘ میں اشاعت کیلئے بھیجے۔

ان تصاویر نے ہر طرف چغتائی کے فن کی دھوم مچادی۔ یوں چغتائی کا پہلا شاہکار 1919ء میں وجود میں آیا اور دنیائے مصوری میں ایک عظیم مصور کی آمد کا اعلان کرگیا، اس کے بعد چغتائی نے پیچھے مڑ کر نہ دیکھا۔ ان کا اسلوب اتنا جداگانہ تھا کہ بعد میں ’’ چغتائی آرٹ ‘‘ مشہور ہوگیا۔ 1928ء میں انھوں نے غالب کے کلام کی مصورانہ تشریح کرتے ہوئےاردو میں اپنے طرز کی پہلی کتاب ’’مرقع چغتائی ‘‘ شائع کی۔

اس کتاب کی شاندار پذیرائی کےبعد عبدالرحمٰن چغتائی نے 1935ء میںغالب ہی کے کلام پر اپنی دوسری کتاب ’’ نقشِ چغتائی ‘‘ شائع کی، اس کتاب نے بھی بے انتہا مقبولیت حاصل کی۔ بعد ازاں، چغتائی کی شہرت پھیلی تو ان کے فن پاروںکی نمائشیں ہندوستان اور دیگر ممالک میںبھی ہونے لگیںاور ان کی شہرت کا ڈنکا بجنے لگا۔ ان کے فن پاروںکے مجموعے بھی شائع ہوئے، جن میں’’ چغتائی پینٹنگز‘‘ اور ’’عمل چغتائی‘‘ قابل ذکر ہیں۔ چغتائی نے افسانہ نگاری پر بھی طبع آزمائی کی اور ان کی نگارشات کے دو مجموعے ’’کاجل‘‘ اور ’’لگان‘‘ شائع ہوئے۔

اسلوب اور انفرادیت

عبدالرحمٰن چغتائی دو روایتوں کے امین تھے، ایک طرف ترک، ایرانی اور مغل مصوری تھی تو دوسری جانب ہندوستانی مصوری کی بنیاد پر مبنی بنگالی آرٹ تھا، جس کا سرا دوہزار سال پہلے کے ایلورا اور اجنتا کے غاروںمیں بنائی گئی تصاویر سے جا ملتاہے۔ یہ اسکول آف آرٹ اٹھارہویں صدی کے درمیان سے لے کر انیسویں صدی کے آغاز تک ہندوستانی مصوری کو اپنی لپیٹ میںلیے ہوئے تھا، جبکہ شوخ رنگوںوالی ترکی اور ایرانی مصوری کے اثرات جب منی ایچر میںمنتقل ہوئے تو ان کے اثر سے چغتائی بھی نہ بچ سکے۔ اسی لیے ہمیں چغتائی کے اسلوب میں دونوں فن ملے جلے نظر آتے ہیں۔

پہلی تصویر اور علامہ اقبالؒ سے ملاقات

ان کی پہلی تصویر کی بھی دراصل ایک کہانی ہے۔ وہ ایک قبر کی تصویر تھی، جس پر ایک عورت غم سے نڈھال تھی۔ اس کے متعلق خود عبدالرحمٰن چغتائی تکنیک اور خیال کے حوالے سے ابہام کا شکار تھے۔ اس تصویر کے بارے میں چغتائی نے خود لکھا کہ انہیں اپنی کوشش کامیاب لگی ، جب وہ تصویر انہوں نے اپنے دوست کو دکھائی تو وہ انہیں تصویر کے ساتھ علامہ اقبالؒ کے پاس لے گئے۔ جاتے ہوئے عبدالرحمٰن چغتائی کے ذہن کے دریچوں میںاپنی تصویر دکھانے سے زیادہ ایک عظیم شاعر سے ملنے کا شوق دل کی دھڑکنیں تیز کررہا تھا۔ تعارف کے بعد علامہ اقبالؒ نے تصویر کا نام پوچھا تو چغتائی نے کہا کہ ان کی تصویر کا نام Too Lateہے ۔ یہ سن کر علامہ اقبالؒ نے بے ساختہ شعر پڑھا،

بجھ گیا وہ شعلہ جو مقصود ِ پروانہ تھا

اب کوئی سودائی سوز تمام آیا تو کیا

اس تصویر پر غور کرتے ہوئے علامہ اقبال ؒ نے مشورہ دیاکہ اس قبر پر سے کلمہ ہٹا دیں اور جو عورت کھڑی ہے اسےزیادہ پریشان نظرآنا چاہئے، یعنی ایک ایسی افسردہ عورت قبر کے پہلو میں بیٹھی ہو جو اپنی متاع لٹا چکی ہو۔ باقی رہا قبر کا تعویذتو اس پر قرآن کی فلاں آیت لکھ دو۔پھر اس کے بعد علامہ اقبالؒ نے فرمایا کہ پہلی مرتبہ میرا ایک ایسے نوجوان سے واسطہ پڑا ہے، جو تصویروں کے ذریعہ اسلامی روایات پیش کرنے کا جذبہ رکھتاہے۔

عبدالرحمٰن چغتائی کی عظمت

عبدالرحمٰن چغتائی نے اسلامی، ہندو، بدھ ازم، مغل اور پنجاب کے موضوعات پر فن پارے تخلیق کیے۔ ان کی تصاویر آج بھی دنیا کی ممتاز آرٹ گیلریوںمیں ایستادہ ہیں ۔ علامہ اقبالؒ، پکاسو اور ملکہ الزبیتھ دوم جیسی شخصیات بھی ان کے فن کی معترف تھیں۔1924ء کی ویمبلے نمائش میںتقریباً 25ملین افراد نے عبدالرحمٰن چغتائی کے فن پاروںکو دیکھا اور ان کے فن کی داد دی۔

شاعر مشرق علامہ اقبال ؒ کی طرح انہیںمصورِ مشرق کہا جاتاہے۔ آپ کو 1960ء میں حکومت پاکستا ن کی جانب سے ہلالِ امتیاز جبکہ 1964ء میں مغربی جرمنی میںطلائی تمغے سے نوازا گیا۔ اپنے عہد کا یہ عظیم مصور 17جنوری 1975ء کو لاہور میںدار ِ فانی سے کوچ کرگیا۔