وزیر اعظم کی معاون خصوصی برائے اطلاعات ڈاکٹر فردوس عاشق اعوان کا کہنا ہے کہ قوم کو لوٹ کر مال بنانے والوں کو عوام نے نظروں سے گرایا اور عمران خان کو دہائیوں سے قوم پر مسلط دو خاندانوں کے استحصالی راج سے نجات کا ذریعہ بنایا ہے۔
سماجی رابطے کی ویب سائٹ ٹوئٹر پر اپنے ایک بیان میں وزیر اعظم کی معاون خصوصی برائے اطلاعات فردوس عاشق اعوان نے کہا کہ وزیراعظم عمران خان کا عوام کے ساتھ احساس اور درد کا رشتہ ہے، وہ ماضی کی حکومتوں کے عوام کو دیئے گئے زخموں پر مرہم رکھ رہے ہیں۔
انہوں نے پیپلز پارٹی کے چیئرمین بلاول بھٹو زرداری کو مخاطب کرتے ہوئے کہا کہ بلاول صاحب! پاکستان کے عوام باشعور ہیں، اپوزیشن کی اصلیت اور نیت دونوں سے عوام بخوبی آگاہ ہیں۔
فردوس عاشق اعوان نے کہا کہ بلاول صاحب! آپ نے بس چلانا ہے تو دو خاندانوں سے لوٹی ہوئی قوم کی دولت واپس دلوادیں اور ان کے خلاف تحریک چلائیں پوری قوم آپ کا ساتھ دے گی۔
معاون خصوصی نے کہا کہ بلاول صاحب عوام کابس چلے تو تھر کے معصوم بچوں کے قاتلوں کو عبرت کا نشان بنا دیں، عوام کا بس چلے تو ان کا مستقبل ان سے چھین لینے والوں کو لوہے کا زیور پہنائیں۔
فردوس عاشق اعوان نے مسلم لیگ نون پر تنقید کرتے ہوئے کہا کہ قوم کو وہ وقت نہیں بھولا جب عوام ’شیر آٹا کھا گیا کے نعرے لگاتے تھے‘، سارے پاکستان کو معلوم ہے کہ اس وقت آٹا، چینی، گھی اور خاص کر کے مرغیوں پر کس کا کنٹرول تھا ۔