مسلم لیگ نون کے وکیل جہانگیر جدون نے الیکشن کمیشن میں فیصل واؤڈا کی بطور سینیٹر کامیابی کا نوٹیفیکیشن روکنے کی درخواست جمع کرا دی۔
جہانگیر جدون کی جانب سے الیکشن کمیشن میں جمع کرائی گئی درخواست میں استدعا کی گئی ہے کہ فیصل واؤڈا کی بطور سینیٹر کامیابی کا نوٹیفیکیشن روکا جائے۔
درخواست گزار وکیل نے کہا ہے کہ فیصل واؤڈا کی نااہلی کی درخواست آج ہی سماعت کیلئے مقرر کی جائے۔
انہوں نے درخواست میں مؤقف اختیار کیا ہے کہ اسلام آباد ہائی کورٹ کہہ چکی ہے کہ فیصل واؤڈا کا حلف نامہ جھوٹا ہے۔
وکیل جہانگیر جدون نے کہا کہ فیصل واؤڈا نہ الیکشن کمیشن اور نہ ہی اسلام آباد ہائی کورٹ میں پیش ہوئے ہیں۔
دوسری جانب سندھ ہائیکورٹ نے الیکشن کمیشن کو نااہلی کی کارروائی روکنے سے متعلق فیصل واؤڈا کی فوری حکم امتناع کی استدعا مسترد کردی۔
سندھ ہائیکورٹ نے الیکشن کمیشن، وفاقی حکومت اور دیگر کو نوٹس جاری کرتے ہوئے 16 مارچ کو تفصیلی جواب طلب کرلیا۔
عدالت نے فیصل واؤڈا نااہلی کیس سے متعلق اسلام آباد ہائی کورٹ کا حکم نامہ بھی طلب کرلیا۔