بالی ووڈ اور تامل فلموں کے سینیئر اداکار اور علاقائی جماعت مکل نیدی مائیم کے بانیکمل ہاسن کو اس وقت سیکیورٹی خدشات کا سامنا کرنا پڑا جب اتوار کو تامل ناڈو کے ضلع کنچیم پورم میں انکی کار کے شیشے کو ایک شخص نے کھولنے کی مبینہ طور پر کوشش کی۔
اداکار سے سیاست دان بننے والے کمل ہاسن کے ساتھ یہ واقعہ اس وقت پیش آیا جب وہ چھ اپریل کو ہونے والے تامل ناڈو اسمبلی کے الیکشن مہم کے سلسلے میں ایک عوامی اجتماع سے خطاب کے بعد واپس چنئی جارہے تھے۔
پولیس نے واقعے کے بعد بتایا کہ مذکورہ بالا شخص کمل ہاسن کا پرستار تھا اور اس نے کھڑکی کھولنے کی اس وقت کوشش کی جب کار لوگوں کیبھیڑ کے درمیان سے گزر رہی تھی۔
پولیس کا مزید کہنا تھا کہ اس کا مقصد کمل ہاسن کو گزند پہنچانا نہیں تھا، اور کار کو بھی کوئی نقصان نہیں پہنچا ہے۔
یہ شخص مبینہ طور پر نشے میں تھا اور اسےمکل نیدی مائیم پارٹی کے کارکنوں اور عوام نے مبینہ طور پر تشدد کا نشانہ بنایا۔ بعد ازاں اسے پولیس نے اسپتال پہنچایا۔
کمل ہاسن کی پارٹی کا کہنا ہے کہ وہ اس حملے کا مقصد جاننے کے لیے تحقیقات کررہے ہیں۔