پاکستان پیپلز پارٹی کے چیئرمین بلاول بھٹو زرداری نے ٹرین حادثے پر وزیر اعظم اور وزیر ریلوے سے مستعفی ہونے کا مطالبہ کردیا۔
قومی اسمبلی میں اظہار خیال کرتے ہوئے بلاول بھٹو نےکہا کہ وزیر اعظم تو کہتے تھے کہ جب ٹرین حادثہ ہو تو وزیر اور وزیر اعظم کو مستعفی ہوجانا چاہیے۔
بلاول بھٹو نے کہا کہ وزیر اطلاعات نے حادثے پر افسوس کا اظہار کیا، ہمیں افسوس کا اظہار نہیں، جواب چاہیے کہ اس حکومت میں ٹرین کے اتنے حادثات کیوں ہورہے ہیں؟
پی پی چیئرمین نے کہا کہ گھوٹکی میں بہت بڑا واقعہ ہوا، وزیر اور ن لیگ کے کاغذی عہدیدار اپنی سیاست چمکانے کیلئے کھڑے ہوجاتے ہیں، ملک کے غریب عوام کی زندگی کا تحفظ ہی نہیں ہے جب وہ ریلوے میں سفر کرتے ہیں۔
بلاول بھٹو نے کہا کہ یہ حادثات پر بھی اپنی سیاست چمکاتے ہیں، ہم نے یہ پیغام دینا ہے کہ حادثے کا شکار افراد کے ساتھ کھڑے ہیں، حکومت نے ریلوے حادثات کا آج تک ہمیں جواب نہیں دیا۔