وزیر اعظم عمران خان سے بین الاقوامی بیوریج کمپنی کے وفد نے ملاقات کی۔ ملاقات میں پاکستان میں ترکی کے سفیر احسان مصطفیٰ یردکل نے بھی شرکت کی۔
اس موقع پر وزیر صنعت خسرو بختیار اور مشیر تجارت عبدالرزاق داؤد بھی موجود تھے۔
سرکاری اعلامیہ کے مطابق وفد نے وزیراعظم کو کمپنی کی پاکستان میں سرمایہ کاری اور مستقبل کی منصوبہ بندی سے آگاہ کرنے کے ساتھ ساتھ انھیں خیبر پختونخوا میں اپنے آئندہ بیوریج پلانٹ کے منصوبے سے بھی آگاہ کیا۔
اس موقع پر بریفنگ دیتے ہوئے وزیراعظم کو بتایا گیا کہ نئے پلانٹ کی بدولت مقامی آبادی کیلئے ملازمت کے بلاواسطہ اور بالواسطہ مواقع پیدا ہوں گے۔
وفد سے گفتگو کرتے ہوئے وزیر اعظم نے کہا کہ عالمی سرمایہ کار کمپنیوں کا پاکستان میں سرمایہ کاری کیلئے اعتماد بحال ہوا ہے۔ مختلف شعبوں میں معاشی ترقی اور روزگار کے بھرپور امکانات روشن ہو رہے ہیں۔