سندھ ٹیک بال ایسوسی ایشن کے نو منتخب صدر اور پاکستان ٹیک بال فیڈریشن کے نائب صدر خالد جمیل شمسی نے کہا ہے کہ رواں سال اکتوبر میں کراچی کے ساحل پر بیچ ٹیک بال چمپئن شپ کا انعقاد کیا جائیگا جس میں صوبہ سندھ کے تمام اضلاع کے کھلاڑی حصہ لیں گے یہ چمپئن شپ ہنگری کے سفارت خانے کے تعاون سے منعقد کیا جائیگا خالد جمیل شمسی نے بتا یا کہ ٹیک بال کھیل جسے دنیا کے ممتاز فٹ بالر رونالڈینوکی سرپرستی حاصل ہے اور وہ اس کھیل کو دنیا میں مقبول بنا نے کے لئے اس کھیل کے سفیر بھی مقرر ہوئے ہیں وہ جلد ہی پاکستان کا بھی دورہ کرینگے۔
خالد جمیل شمسی نے کہاکہ پاکستان میں یہ کھیل تیزی کے ساتھ مقبول ہورہا ہے اس اس حوالے سے سندھ میں اس کی باقاعدہ ایسوسی ایشن کا قیا م بھی عمل میں آگیا ہے جس کے سیکریٹری حق نواز ہیں اور وہ عاشورہ محرم الحرام کے بعد سندھ کے تمام اضلاع کا دورہ کرینگے اور ہر ڈویژن اور ضلعے میں ٹیک بال ایسوسی ایشن تشکیل دی جائیگی۔
خالد جمیل شمسی نے کہا کہ خیبر پختونخواہ سے تعلق رکھنے والے میاں ابصار علی جو کہ فیڈریشن کے صدر ہیں جلد ہی کراچی آئیں گے اور کراچی میں ٹیک بال کھیل اس کے قوانین،دنیا میں اس کا مقام اور پاکستان میں اس کھیل کے مستقبل کے بارے میں تفصیلی اظہار خیال کرینگے۔
خالد جمیل شمسی نے سندھ کے نوجوانوں سے اپیل کی ہے کہ وہ ٹیک بال کھیل پر بھر پور توجہ دیں میں وعدہ کرتا ہوں کہ میں اس کھیل کو سندھ میں مقبول ترین کھیل بنا نے میں دامے،درمے،سخنے اپنا کردار ادا کرونگا،انہوں نے پرنٹ و الیکٹرانک میڈیا سے بھی اپیل کی کہ وہ کھیل کی پذیرائی میں ٹیک بال فیڈریشن اور صوبائی ایسوسی ایشن کی سرپرستی کریں۔ ( نصر اقبال)