امریکی نائب صدر مائیک پنس نے وزیر اعظم شاہد خاقان عباسی کو فون کرکے امریکی خاندان کی بحفاظت بازیابی پر پاکستان کا شکریہ ادا کیا ہے۔
وزیراعظم ہاؤس کے ترجمان کا کہنا ہے کہ امریکی نائب صدر نے وزیر اعظم سے بات کرتے ہوئے افواج پاکستان اور انٹیلی جنس ایجنسیوں کی پیشہ ورانہ صلاحیتوں کو سراہا ۔
وزیر اعظم شاہد خاقان نے کہا کہ پاکستان امریکا کی فراہم کردہ قابل عمل انٹیلی جنس اطلاع پر کارروائی کرے گا۔
امریکی نائب صدر نے خطے میں امن و خوش حالی کے لیے دو طرفہ تعلقات کو مضبوط کرنے کی خواہش کا اظہار کیا۔
دونوں رہنماؤں نے باہمی دلچسپی کےامورمیں تعاون کو مضبوط کرنے کے لیے اعلیٰ سطح کے روابط پر اتفاق کیا۔
امریکی نائب صدرنے مستقبل قریب میں پاکستان کے دورے کی دعوت قبول کرلی۔