اسمبلیاں توڑنے کا چیلنج تاحال برقرار ہے، رانا ثناء اللّٰہ

وفاقی وزیر داخلہ رانا ثناء اللّٰہ نے کہا ہے کہ اسمبلیاں توڑنے کا چیلنج تاحال برقرار ہے۔

جیو نیوز کے پروگرام ’آج شاہزیب خانزادہ کے ساتھ‘ میں گفتگو کے دوران رانا ثناء اللّٰہ نے کہا کہ ہم صرف یہ چیک کرنا چاہتے ہیں کہ وزیراعلیٰ کو ایوان کا اعتماد بھی حاصل ہے یا نہیں۔

نواز شریف کی خرم دستگیر کو بجلی قیمت سے متعلق بڑی ہدایت

وفاقی وزیر توانائی خرم دستگیر کو سابق وزیراعظم نواز شریف نے بجلی قیمت سے متعلق بڑی ہدایت دے دی۔

انہوں نے کہا کہ عدم اعتماد جمع نہ کراتے تو کل ہم سے سوال ہوتا کہ آپ نے آئینی راستہ کیوں اختیار نہیں کیا؟

وزیر داخلہ نے مزید کہا کہ اسپیکر اور ڈپٹی اسپیکر کے خلاف بھی تحریک عدم اعتماد جمع کرائی ہے۔

ان کا کہنا تھا کہ وزیراعلیٰ اسمبلی توڑنا چاہتا ہے تو اسمبلی کا اعتماد پہلی شرط ہے،گورنر پنجاب نے سی ایم کو ایڈوائس بھیجی ہے کہ اعتماد کا ووٹ حاصل کرے۔

رانا ثناء اللّٰہ نے یہ بھی کہا کہ ہم الیکشن کے لئے تیار ہیں، اسمبلیاں توڑنا غیر جمہوری اور غیر آئینی عمل ہے۔

انہوں نے یہ بھی کہا کہ پاگل انسان اپنی انا کی خاطر اسمبلیاں قربان کررہا ہے، اسمبلی توڑنا چاہتے ہیں تو پہلے اعتماد حاصل کریں اور اسمبلی توڑیں، بسم اللّٰہ۔

وفاقی وزیر داخلہ نے کہا کہ سیاست میں ہر چیز ممکن ہوسکتی ہے، سیاست ممکنات کا کھیل ہے، میری لیڈر شپ سیاستدان ہے، ان میں ضد اور پاگل پن نہیں ہے۔

ان کا کہنا تھا کہ اگر موجودہ صورتحال میں کوئی چیز سود مند ہوئی تو ضرور اختیار کریں گے۔