فرمان الہی
نماز کے اوقات
پاکستان کے سیلاب متاثرین کی بحالی کیلئے دنیا کے مختلف ملکوں نے تقریباً 10 ارب ڈالرز امداد کے وعدے کر لیے۔
جنیوا کانفرنس میں اسلامی ترقیاتی بینک نے اعلان کیا کہ وہ پاکستان کو تین سال کے عرصے میں 4 ارب 20 کروڑ ڈالر کی رقم دے گا، عالمی بینک نے پاکستان کے لیے دو ارب ڈالر کا اعلان کیا۔
یورپی یونین نے اعلان کیا کہ وہ سیلاب متاثرین کیلئے پاکستان کو 50 کروڑ یورو دے گی، یورپی یونین نے پاکستان میں ترقی اور روزگار کی فراہمی کیلئے بھی 8 کروڑ 70 لاکھ ڈالر دینے کا اعلان کیا ہے۔
یو ایس ایڈ نے اعلان کیا کہ وہ پاکستان کو دس کروڑ ڈالر کی رقم دے گی۔
چین نے پاکستان کو 10 کروڑ ڈالر دینے کا اعلان کیا، جرمنی نے پاکستان کو 8 کروڑ 80 لاکھ ڈالر دینے کا اعلان کیا، جاپان نے پاکستان کو 7 کروڑ 70 لاکھ ڈالر امداد دینے کا اعلان کیا، جبکہ فرانس نے پاکستان کو ایک کروڑ ڈالر امداد دینے کا اعلان کیا۔
وزیر اطلاعات مریم اورنگزیب نے کہا ہے سعودی عرب نے بھی پاکستان کیلئے ایک ارب ڈالر دینے کا اعلان کیا ہے۔
مریم اورنگزیب نے کہا کہ ایشین انفرا اسٹرکچر انویسٹمنٹ بینک نے بھی پاکستان کیلئے ایک ارب ڈالر دینے کا اعلان کیا ہے۔
جنیوا کانفرنس میں 40 ممالک کے حکام، پرائیویٹ ڈونرز اور بین الاقوامی مالیاتی اداروں نے شرکت کی۔
وزیر اعظم نے صدر اسلامی ترقیاتی بینک کا شکریہ ادا کیا
وزیر اعظم شہباز شریف نے جنیوا کانفرنس میں اسلامی ترقیاتی بینک کی جانب سے پاکستان کے لیے 4 ارب 20 کروڑ ڈالر فراہم کرنے کے اعلان پر صدر اسلامی ترقیاتی بینک کا شکریہ ادا کیا۔
شہباز شریف نے کہا کہ 4 ارب 20 کروڑ ڈالر کا اعلان خوش آئند اور حوصلہ کن ہے، یقین دلاتے ہیں کہ وہ اور ان کی حکومت اُن کی امیدوں پر پورا اترنے میں کوئی کسر نہیں چھوڑے گی۔
متاثرین کےلیےامداد کاشفاف استعمال ہوگا، وزیراعظم
وزیراعظم شہباز شریف نے یو این سیکریٹری جنرل کے ساتھ مشترکہ پریس کانفرنس کرتے ہوئے کہا کہ سیلاب متاثرین کے لیے ملنے والی امداد کا شفاف استعمال یقینی بنایا جائے گا، تھرڈ پارٹی آڈٹ کروایا جائے گا۔
شہباز شریف نے کہا کہ سیلاب متاثرین کے ساتھ بھرپور یکجہتی پر عالمی برادری کے شکر گزار ہیں، سیلاب کے باعث پاکستان کو 30 ارب ڈالر سےزائد کا مالی نقصان ہوا۔
ان کا کہنا تھا کہ پاکستان میں سیلاب سے متاثرہ علاقوں کی تعمیر نو کے ساتھ ملکی معیشت کی بحالی بڑا چیلنج ہے، جو جی ڈی پی کا 8 فیصد ہے۔
سیکرٹری جنرل یو این کا جنیوا کانفرنس سےخطاب
اقوام متحدہ کے سیکریٹری جنرل انتونیو گو تیرس کا پاکستان کی تعمیر نو کیلئے بڑے پیمانے پر سرمایہ کاری کا مطالبہ کردیا۔
کانفرنس سے خطاب کرتے ہوئے کہا پاکستان موسمیاتی تباہی،عالمی مالیاتی نظام کے دیوالیہ پن کا ایک ساتھ شکار ہوا، انفرا اسٹرکچر کی بحالی کیلئے بڑے پیمانے پر اقدامات کی ضرورت ہے۔
انتونیو گو تیرس نے کہا کہ پاکستان جیسے ترقی پذیر ممالک کیلئے قرضوں سے نجات،مالی امداد تک رسائی کیلئے مزید طریقے تلاش کرنے کی ضرورت ہے۔
ان کا کہنا تھا کہ پاکستان کو 3 سال کی مدت میں 16 بلین ڈالرز سے زائد کی امداد درکار ہوگی، ترقی یافتہ ممالک کو مزید مالی مدد کرنی چاہیے۔
پاکستان کا بیشتر حصہ سیلابی پانی میں ڈوبا ہوا ہے، بلاول
اس سے قبل وزیر خارجہ بلاول بھٹو زرداری نے جنیوا کانفرنس کے افتتاحی سیشن میں خطاب میں کہا کہ پاکستان کا بیشتر علاقہ تاحال سیلابی پانی میں ڈوبا ہوا ہے،انہوں نے کہا کہ سیلاب سے 3 کروڑ 30 لاکھ افراد متاثر ہوئے۔
وزیر خارجہ نے مشکل وقت میں پاکستان کی مدد کرنے والے ممالک کا شکریہ ادا کیا ۔
قبل ازیں سیکریٹری جنرل یواین نے کانفرنس میں شرکت کرنےوالےمہمانوں کا شکریہ ادا کیا۔
انہوں نے کہا کہ پاکستان میں حالیہ سیلاب سےبڑا حصہ متاثر ہوا ہے، سیلاب سے80لاکھ کےقریب لوگ بے گھر ہوئے، مشکل حالات میں بھی پاکستانیوں کا جذبہ دیکھ کر حیران ہوا۔
انہوں نے کہا کہ انفرا اسٹرکچرکی بحالی کےلیے بڑے پیمانے پر اقدامات کی ضرورت ہے۔
انہوں نے مزید کہا کہ پاکستان کو 3سال کی مدت میں16.3 بلین ڈالر کی امداد درکار ہوگی، کانفرنس کے ذریعے کیش، ٹرانسفر اور دیگر طریقہ کار سے مدد کی جاسکتی ہے۔
