قطر: اسرائیل کیلئے جاسوسی، بھارتی بحریہ کے 8 سابق اہلکاروں کو سزائے موت ہوسکتی ہے، بھارتی اخبار

26 اپریل ، 2023

قطر میں قید بھارتی بحریہ کے 8 سابق اہلکاروں کو اسرائیل کے لیے جاسوسی کرنے کے الزام میں موت کی سزا ہو سکتی ہے۔ گذشتہ برس 30 اگست کو حراست میں لیے گئے بھارتی بحریہ کے سابق اہلکاروں کے مقدمے کی سماعت 3 مئی کو ہوگی۔

بھارتی اخبار کے مطابق بھارتی اہلکاروں پر اطالوی ساختہ جدید ترین آبدوزیں خریدنے سے متعلق قطر کے خفیہ پروگرام کی تفصیلات اسرائیل کو فراہم کرنے کا الزام ہے۔

قطر کی خفیہ ایجنسی کا کہنا ہے کہ اس نے خفیہ طریقے سے الیکٹرانک رابطے کے کچھ پیغامات پکڑے، جن سے یہ ثابت ہوتا ہے کہ سابق اہلکار آبدوزوں کے پروگرام کی جاسوسی کر رہے تھے۔

غیر ملکی میڈیا کے مطابق بھارتی اہلکاروں کے علاوہ دوحا کی نجی دفاعی کمپنی کے چیف ایگزیکٹو افسر اور قطر کے انٹرنیشنل ملٹری آپریشنز کے سربراہ پر بھی اسرائیل کے لیے جاسوسی کرنے کا الزام عائد کیا گیا ہے۔

بھارتی بحریہ کے سابق اہلکار قطر کے دارالحکومت دوحا کی نجی دفاعی کمپنی میں کام کرتے تھے۔

ترجمان بھارتی وزارت خارجہ ارندام باغچی کا کہنا ہے کہ قطری حکام سے رابطے میں ہیں، مقدمے کی پہلی سماعت 29 مارچ کو ہوئی تھی، آئندہ سماعت 3 مئی کو ہے۔

انہوں نے کہا کہ بھارتی بحریہ کے سابق اہلکاروں کو قونصلر کی مدد کے ساتھ قانونی مدد بھی فراہم کر رہے ہیں۔

بین الاقوامی خبریں سے مزید