گداگری کے خاتمے کیلئے موثر حکمت عملی ناگزیر ہے، ڈاکٹر محبوب

پشاور (جنگ نیوز)محبوب میڈیکل انسٹیٹیوٹ حیات آباد کے چیئر مین اورمایہ ناز فزیو تھراپسٹ و سماجی شخصیت ڈاکٹر محبوب الرحمٰن نے کہا ہے کہ گداگری کے خاتمے کیلئے ملک بھر میں موثر حکمت عملی کی اشد ضرور ت ہے، حکومت پیشہ ور گداگروں پر پابندی لگاکر نوجوانوں کو ہنر مند بنانے پر توجہ دے،جبکہ سکولوں سے باہر بچوں کو تعلیم کی طرف راغب کرنے کیلئے نجی شعبے کے ساتھ مل کر سکولوں میں سیکنڈ شفٹ چلائی جائے۔نوجوانوں کی بڑی تعداد بھیک مانگنے اور مختلف قسم کے نشوں کی جانب راغب ہورہی ہےجنہیں بچانے کی بہت سخت ضرورت ہےورنہ ملک میں بدامنی، چوری اور دیگر جرائم میں اضافہ ہوگا۔پالیسی ساز اداروں نے ابھی تک اس تناظر میں سنجیدگی سے کام نہیں کیا، اس لئے ضرورت اس امر کی ہے نوجوانوں کوہنر سکھا نے کے مواقع فراہم کئے جائیں جبکہ یہ پروگرام نجی شعبے کے ساتھ مل کر بہتر انداز میں چلایا جاسکتا ہے۔