فرمان الہی
نماز کے اوقات
آرٹس کونسل آف پاکستان کراچی اسٹیج شو کمیٹی کی جانب سے فنِ موسیقی سے تعلق رکھنے عالمی شہرت یافتہ پاپ سنگر حسن جہا نگیر کو ٹریبیوٹ پیش کرنے کے لیے تقریب کا انعقاد آڈیٹوریم ٹو میں کیا گیا۔
تقریب میں صدر آرٹس کونسل محمد احمد شاہ سمیت شوبز انڈسٹری سے تعلق رکھنے والی نامور شخصیات نے شرکت کی۔ جن میں اظہر حسین، امجد شاہ، سعادت علی جعفری، کاشف گرامی، ایوب کھوسو، شکیل صدیقی، حنیف راجا، بابر عباسی، کمال مغل، طحہ سلیم، اقبال شاہ اور ایاز خان و دیگر شامل تھے۔
تقریب کے آغاز میں حسن جہانگیر کی فنی زندگی پر بنائی گئی شوریل پیش کی گئی۔
تقریب سے صدر آرٹس محمد احمد شاہ نے اظہار خیال کرتے ہوئے کہا کہ حسن ایک سچا اور اچھا انسان ہے۔ حسن کا گانا ”ہواہوا“ دنیا بھر میں بہت مشہور ہوا۔ اگر یہ گانا آج ریلیز ہوا ہوتا تو حسن لاکھوں میں کماتا۔
انہوں نے مزید کہا کہ حسن اور عمر شریف جیسے فنکاروں نے پاکستان کو انڈیا میں منوایا۔ حسن خوشیوں کے سفیر ہیں۔ حکومت پاکستان کا شکریہ ادا کرتا ہوں، جس نے آرٹسٹوں کی پذیرائی کی۔
سعادت علی جعفری نے کہا انسان مٹی ہو جاتا ہے، لیکن اس کا کام یاد رہتا ہے۔
اظہر حسین نے کہا کہ آرٹس کونسل آف پاکستان کراچی میں فن و ثقافت سے تعلق رکھنے والی تمام شخصیات کو سراہا جا تا ہے۔ حسن جہانگیر کا جانا مانا گانا ”ہوا ہوا“میں ڈرم میں نے بجایا۔ ان کی وجہ سے ہمیں بھی پوری دنیا میں عزت ملی۔
کاشف گرامی نے کہا احمد شاہ کے آنے کے بعد آرٹس کونسل صرف تعزیتی ریفرینس نہیں کرتا بلکہ آرٹسٹوں کے کام کو ان کی حیات میں ہی خوب سراہا جاتا ہیں۔ حسن جہانگیر کے گانے ”ہوا ہوا“ نے پاکستان کی تاریخ بنائی ہے۔ چالیس سال گزرنے کے بعد بھی لوگ ان کا گانا گنگناتے ہیں۔
کمال مغل نے کہا کہ وہ نہایت مخلص دوست ہیں اور بہترین انسان ہیں۔ زاہد شاہ نے کہا کہ یہ ہمارے پاکستان کا فخر ہیں۔
طحہٰ سلیم نے کہا کہ ہم نے حسن جہانگیر کے نا م کی شاہراہ بنائی ہے۔
ایاز خان نے کہا کہ حسن جہانگیر پرجوش انداز میں گانا گاتے تھے۔ ان کی پہچان کے لیے گانا آکسیجن کا کام کرتا ہے۔
عمران ساجن نے کہا کہ باہر کے ممالک میں ایک آرٹسٹ کو پہچاننا بہت مشکل ہوتا ہے، لیکن حسن جہانگیر کو لوگ با آسانی پہچان لیتے ہیں کیونکہ ان کو ایک جم غفیر گھیر لیتا ہے۔
امجد شاہ نے کہا کہ ایک زمانہ تھا، جب شادی کی کوئی بھی رسم ان کے گانوں کے بنا مکمل نہیں ہو تی تھی۔ یہ خواتین میں بہت مقبول تھے۔
ایوب کھوسو نے کہا کہ حسن جہانگیر کے بارے میں بتانا دریا کو کوزے میں بند کرنے کے مترادف ہے۔ حسن جہانگیر پورے برصغیر میں ایک مشہور شخصیت ہیں۔
اس موقع پر صاحبِ شام حسن جہانگیر نے کہا کہ مجھے شرم آرہی تھی، جب لوگ میری تعریف کر رہے تھے، کیونکہ اللہ نے انسان کو بنایا ہی اس لیے ہے کہ وہ دوسروں کی مدد کرے۔ اگر انسان ایمانداری کے ساتھ رب کی دی ہوئی طاقت کو استعمال کرے تو وہ ضرور کامیاب ہوگا۔
