سوشل میڈیا سروسز آئندہ 2 سے 3 روز میں معمول پر آجائیں گی، ذرائع

فائرل وال کی تنصیب کا دوسرا ٹرائل کامیابی کے ساتھ مکمل کرلیا گیا، سوشل میڈیا سروسز آئندہ 2 سے 3 روز میں معمول پر آجائیں گی۔

ذرائع ٹیلی کام کا کہنا ہے کہ انٹرنیٹ سروس فراہم کرنے والی کمپنیوں پر فائر وال انسٹال کردی گئی، فائر وال سے موبائل سگنلز انٹرنیٹ سروس کو بھی ڈاؤن کیا گیا۔

نیشنل سیکیورٹی کے پیش نظر فائر وال کی تنصیب کی جا رہی ہے، فائر وال ڈیپ پیکٹ انسپیکشن کی صلاحیت کی حامل ہوگی۔

پاکستان میں کئی روز سے انٹرنیٹ سروس شدید متاثر، صارفین پریشان

واٹس ایپ پر رابطہ ہو، یا آن لائن خریداری، تصویر اپ لوڈ کرنی ہو یا کوئی ویڈیو دیکھنی ہو، ملک بھر میں انٹرنیٹ کی رفتار موضوع بحث بن گئی۔

یاد رہے کہ ملک کو فائیو جی ٹیکنالوجی کے دور میں دیکھنے کے خواہشمند عوام کو فور جی کے لالے پڑ گئے۔ ملک میں انٹرنیٹ کا بھٹہ بیٹھ گیا۔ ویڈیو تو دور کی بات، تصویر ٹرانسفر کرنا بھی صارف کو پتھر کے دور کا مزہ دینے لگا۔

گھریلو صارفین کی پریشانی اپنی جگہ، تاجروں اور کاروباری افراد کےلیے سودے طے کرنا ایسا ہی ہوگیا جیسے چٹانوں سے دودھ کی نہر نکالنے کی کوشش کی جائے۔

کہا جا رہا ہے کہ سوشل میڈیا پر ناپسندیدہ اور ریاست مخالف مواد پر نظر رکھنے اور وہ مواد پھیلانے والوں کو پکڑنے کےلیے ایک ’دیوار آتش‘ یا عرف عام میں ’فائر وال‘ لگائی جارہی ہے۔