تخریب کاری کے واقعات پاکستان میں عدم استحکام پیدا کرنے کی سازش ہیں: محسن نقوی

وفاقی وزیرِ داخلہ محسن نقوی نے کہا ہے کہ تخریب کاری کے واقعات پاکستان میں عدم استحکام پیدا کرنے کی سازش ہیں۔

بلوچستان میں دہشت گردی کے واقعات پر جاری کیے گئے بیان میں انہوں نے کہا کہ تحقیقات کے بعد حقائق ثبوت کے ساتھ سامنے لائیں گے۔

محسن نقوی کا کہنا ہے کہ دشمن سوچے سمجھے منصوبے کے تحت ملک میں انارکی پیدا کرنا چاہتا ہے، سیکیورٹی فورسز، قانون نافذ کرنے والے اداروں نے بر وقت کارروائی کر کے 12 دہشت گردوں کو جہنم واصل کیا۔

موسیٰ خیل: گاڑیوں سے اتار کر 23 افراد قتل، بسیں، ٹرک جلا دیے گئے

بلوچستان کے ضلع موسیٰ خیل کے علاقے راڑہ شم میں 23 مسافروں کو قتل کر دیا گیا۔

انہوں نے کہا کہ بلوچستان میں قیامِ امن کے لیے ہر ممکن اقدام کیا جائے گا، دہشت گردوں اور سہولت کاروں کو چھپنے کی جگہ نہیں ملے گی، بلوچستان حکومت کے ساتھ رابطے میں ہوں۔

وفاقی وزیر کا کہنا ہے کہ امن کی فضاء برقرار رکھنے کے لیے مؤثر اقدامات کیے جا رہے ہیں، دہشت گردی کے واقعات میں شہداء کے لواحقین کے غم میں برابر کے شریک ہیں۔

ان کا یہ بھی کہنا ہے کہ دہشت گردی کے مکمل خاتمے تک جنگ جاری رہے گی، بلوچستان میں امن و امان کی صورتِ حال کو مستقل بنیادوں پر مانیٹر کیا جا رہا ہے۔