فرمان الہی
نماز کے اوقات
بھارت کے انکار کی وجہ سے آئی سی سی چیمپئنز ٹرافی کے شیڈول کا اعلان تو نہ کیا جا سکا لیکن انٹرنیشنل کرکٹ کونسل نے چیمپئنز ٹرافی دبئی سے اسلام اباد پہنچادی۔
آئی سی سی کے شیڈول کے مطابق 16 نومبر سے چیمپئنز ٹرافی ٹور کا آغاز ہوگا اور ٹور 24 نومبر تک جاری رہے گا، ٹرافی ٹور کا آغاز اسکردو سے ہوگا، اسکردو کے بعد چیمپئنز ٹرافی کو کے ٹو بیس کیمپ لے جایا جائے گا، ٹرافی ٹور میں وہ شہر بھی کور ہوں گے جہاں چیمپئنز ٹرافی کے میچز ہونا ہیں۔
واضح رہے کہ یہ پہلا موقع ہے کہ چیمپئنز ٹرافی کے شیڈول کے اعلان کے بغیر ہی ٹرافی ٹور شروع ہو گا، آئی سی سی ٹورنامنٹ کے آغاز سے 4 ماہ پہلے شیڈول کا اعلان کرتا ہے۔
مینز ٹی20 ورلڈ کپ 2024 کے شیڈول کا اعلان 4 ماہ پہلے جنوری میں کیا گیا تھا، مینز ون ڈے ورلڈ کپ 2023 کے شیڈول کا اعلان 3 ماہ پہلے جون میں ہوا تھا۔
آئی سی سی چیمپئنز ٹرافی 19 فروری سے 9 مارچ تک پاکستان میں شیڈولڈ ہے آئی سی سی نے چیمپئنز ٹرافی کے شیڈول کا اعلان 11 نومبر کو لاہور میں کرنا تھا لیکن یہ تقریب منسوخ کر دی گئی تھی۔
بھارتی انکار کے باعث آئی سی سی ٹرافی کے شیڈول کا اعلان نہیں کر پا رہا چیمپئنز ٹرافی میں بھارت کے تمام میچز لاہور میں منعقد ہونا تھے۔
