فرمان الہی
نماز کے اوقات
وزیر اعظم شہباز شریف کا کہنا ہے کہ امید ہے رجب طیب اردوان کا دورۂ پاکستان بہت مفید ثابت ہو گا۔
ترکیہ پاکستان کے درمیان تعاون کی مفاہمتی یادداشتوں اور معاہدوں پر دستخط کی تقریب سے خطاب کرتے ہوئے انہوں نے کہا کہ ترک صدر رجب طیب اردوان کو پاکستان آمد پر خوش آمدید کہتا ہوں۔
شہباز شریف کا کہنا ہے کہ پاکستان اور ترکیہ کے درمیان برادرانہ تعلقات قائم ہیں، دونوں قوموں کے تعلقات صدیوں پر محیط ہیں، صدر اردوان نے سیلاب کے دوران تعاون سے پاکستانی عوام کے دل جیت لیے۔
وزیرِ اعظم نے کہا کہ صدر اردوان نے مشکل گھڑی میں پاکستان کے سیلاب متاثرہ علاقوں کا دورہ کیا، سیلاب کے دوران انہوں نے پاکستان کی فراخدلی سے امداد کی، پاکستان اور ترکیہ کے درمیان پائیدار شراکت داری کو مزید فروغ مل رہا ہے، دونوں ممالک کے درمیان برادرانہ تعلقات نئی بلندیوں کو چھو رہے ہیں۔
ان کا مزید کہنا ہے کہ غزہ پر ہمارا مؤقف بڑا واضح ہے، ترکیہ نے مسئلہ کشمیر پر ہمیشہ پاکستان کے مؤقف کی حمایت کی، پاکستان قبرص کے معاملے پر ہمیشہ ترکیہ کے مؤقف کی حمایت کرتا رہے گا۔
انہوں نے یہ بھی کہا کہ پاکستانی سیکیورٹی فورسز دہشت گردی کے خلاف نبرد آزما ہیں، دہشت گرد مزموم عزائم کے لیے افغان سرزمین استعمال کر رہے ہیں۔
اس موقع پر گفتگو کرتے ہوئے ترک صدر رجب طیب اردوان نے کہا ہے کہ پاکستان آکر دلی مسرت ہوئی، پاکستان ہمارا دوسرا گھر ہے۔
انہوں نے کہا کہ قائد اعظم اور علامہ اقبال ہمارے بھی ہیرو ہیں، باہمی تعلقات مزید مضبوط بنانے پر اتفاق کیا ہے، ہمارے درمیان 24 معاہدوں اور مفاہمتی یادداشتوں پر اتفاق ہوا۔
ترک صدر نے کہا کہ صدر آصف زرداری سے ملاقات میں تجارتی امور پر گفتگو ہوئی، اپنے سرمایہ کاروں کو پاکستان میں سرمایہ کاری کی ترغیب دے رہے ہیں، دونوں ممالک میں 5 ارب ڈالرز کے تجارتی حجم پر بات چیت ہوئی ہے، دفاع اور دفاعی پیداوار کے شعبوں میں تعاون کے فروغ پر گفتگو ہوئی۔
ان کا کہنا ہے کہ وزیرِ اعظم شہباز شریف نے ترکیہ کے زلزلے سے متاثرہ علاقوں کا دورہ کیا، دونوں ممالک کے عوام کے درمیان گہرے تعلقات ہیں، پاکستان نے دہشت گردی کے خلاف بڑی قربانیاں دی ہیں۔
رجب طیب اردوان نے کہا کہ دہشت گردی میں شہید ہونے والوں کے اہلخانہ سے تعزیت کرتے ہیں، ہم دہشت گردی کے خلاف جنگ میں پاکستان کی مکمل حمایت کرتے ہیں، دونوں ممالک کے درمیان تعلقات کو مزید مستحکم کرنے کے لیے کام کرتے رہیں گے۔
انہوں نے مزید کہا کہ ترکیہ کی معارف فاؤنڈیشن کے اسکولوں کا پاکستان کے تعلیمی شعبے میں اہم کردار ہوگا، مسئلہ کشمیر کے حل کے لیے پاکستان کی کوششوں کی حمایت کرتے ہیں۔
ترک صدر کا یہ بھی کہنا ہے کہ قبرص کے معاملے پر پاکستانی حمایت ہمارے لیے بہت اہمیت رکھتی ہے، دنیا کے ہر فورم پر پاکستان کے ہمراہ فلسطین کے لیے آواز بلند کی، فلسطینی بہن بھائیوں کی مدد ہمارا فرض ہے، آزاد فلسطینی ریاست کے قیام کے لیے مل کر کوششیں جاری رکھیں گے۔
پاکستان اور ترکیہ کے درمیان تعاون کے 24 مفاہمتی یاداشتوں اور معاہدوں پر دستخط ہوئے، وزیرِ اعظم شہباز شریف اور ترک صدر رجب طیب اردوان نے تقریب میں شرکت کی۔
اس سے قبل ترکیہ کے صدر رجب طیب اردوان کا وزیرِ اعظم ہاؤس آمد پر پُرتپاک استقبال کیا گیا۔
وزیرِ اعظم شہباز شریف نے مہمان صدر کو خوش آمدید کہا۔
صدر اردوان کو گارڈ آف آنر پیش کیا گیا اور ایئر فورس نے فلائی پاسٹ کر کے مہمان ان کو سلامی دی جبکہ دونوں ملکوں کے ترانے بجائے گئے۔
وزیرِ اعظم نے ترک صدر سے اپنی کابینہ کا تعارف کرایا، آرمی چیف جنرل عاصم منیر نے بھی ترک صدر سے مصافحہ کیا۔
