فرمان الہی
نماز کے اوقات
پاکستان شوبز انڈسٹری کے معروف ماڈل و اداکار عمر شہزاد بھی رشتۂ ازدواج میں منسلک ہو گئے۔
شوبز انڈسٹری میں ان دنوں شادی کا سیزن چل رہا ہے، پہلے فنکار جوڑی ماورا حسین اور امیر گیلانی، پھر کبریٰ خان اور گوہر رشید نے اپنی شادی کا اعلان کیا ان کے بعد باری آئی اداکار احمد علی اکبر کی، جو سوشل میڈیا انفلوئینسر و وکیل ماہم بتول کے ہمراہ شادی کے بندھن میں بندھ گئے۔
اب گزشتہ روز فوٹو اینڈ ویڈیو شیئرنگ پلیٹ فارم انسٹاگرام پر اداکار عمر شہزاد نے بھی اپنی زندگی کے نئے سفر کے آغاز کا اعلان کر دیا ہے۔
دلچسپ بات یہ ہے کہ انہوں نے بھی حال ہی میں شادی کرنے والی فنکار جوڑی کبریٰ خان اور گوہر رشید کی طرح حرم شریف کی تصاویر کے ساتھ احرام میں اپنے نکاح کا اعلان کیا ہے۔
اداکار نے سوشل میڈیا پر بیت اللّٰہ کے سامنے بنائی گئی تصاویر شیئر کی ہیں اور مداحوں کو خوش خبری سنائی ہے۔
انہوں نے سوشل میڈیا پر تصاویر شیئر کرتے ہوئے کیپشن میں قرآنی آیت لکھی ہے جس کا مفہوم کچھ یوں ہے کہ اور ہم نے تم کو جوڑے میں پیدا کیا (78:8)
اداکار نے لکھا ہے کہ مکہ مکرمہ کے بابرکت آسمان تلے ایک نئی شروعات، اللّٰہ کرے کہ ہماری نئی زندگی اس کی رحمت، شفقت اور ایمان کے سائے میں پھولے پھلے۔
واضح رہے کہ عمر شہزاد نے مذکورہ پوسٹ میں اہلیہ کی شناخت ظاہر نہیں کی ہے، جس سے اندازہ ہوتا ہے کہ ان کی اہلیہ کا تعلق شوبز انڈسٹری سے نہیں ہے۔
اداکار کی جانب سے نکاح کے اعلان کے بعد مداحوں اور ساتھی فنکاروں کی جانب سے اس نئے سفر کے لیے مبارک باد اور نیک خواہشات کا سلسلہ شروع ہو گیا ہے۔
