فرمان الہی
نماز کے اوقات
کراچی کے علاقے گلشن اقبال میں پولیس نے خفیہ اطلاع پر کارروائی کرتے ہوئے شارٹ ٹرم کڈنیپنگ میں ملوث دو جعلی پولیس اہلکار گرفتار کرلیے۔
ملزمان نے سول ایوی ایشن ملازم، پولیس اہلکار اور اہم ادارے کے دو افسران سمیت عام شہریوں کو بھی اغوا کیا۔
گلشن اقبال بلاک 4 مسکن سگنل کے قریب پولیس نے خفیہ اطلاع پر کارروائی کرتے ہوئے شارٹ ٹرم کڈنیپنگ میں ملوث 2 ملزمان کو گرفتار کرلیا، ملزمان میں سے ایک خود کو پولیس افسر دوسرا پولیس اہلکار ظاہر کرتا تھا۔
جعلی پولیس افسر کی شناخت بلاول خلجی اور جعلی اہلکار کی شناخت وقاص کے ناموں سے ہوئی ہے، ملزمان نے سول ایوی ایشن ملازم، پولیس اہلکار اور اہم ادارے کے دو افسران سمیت عام شہریوں کو بھی اغواء کیا۔
ملزمان غیر اخلاقی ویب سائٹ پر دوستی کرکے شہریوں کو پھانستے تھے اور اغواء کرکے ہتھکڑی لگا کر ویڈیوز بھی بناتے تھے، گرفتار ملزمان کے موبائل فون سے مغویوں کی ہتھکڑی لگی متعدد ویڈیوز بھی ملی ہیں، وہ مغویوں کو کئی گھنٹے کار میں گھماکر اے ٹی ایم کارڈ بھی خالی کرواتے تھے۔
گرفتار ملزمان کے قبضے سے 2 پستول، 20 بیگ، پولیس یونیفارم اور درجنوں بیجز، ہتھکڑی، 8 موبائل فونز ،جعلی بلٹ پروف جیکٹ، متعدد گھڑیاں، جدید ترین بڑی ایل سی ڈی برآمد ہوئی ہیں۔
ملزم بلاول خلجی کے خلاف رحیم یار خان اور کراچی میں 5 مقدمات درج ہیں، جبکہ ملزمان کے گروہ میں خواتین بھی شامل ہیں جن کی گرفتاری کیلئے کوششیں جاری ہیں۔
