فرمان الہی
نماز کے اوقات
پہلی ہی قسط سے ناظرین کی توجہ حاصل کرنے والا جیو ٹی وی کا سنسنی خیز ڈرامہ سیریل ”کیس نمبر 9“ اپنے فیصلہ کن انجام کو پہنچ گیا، جہاں طویل قانونی جدوجہد کے بعد ریپ کی شکار سحر کو بالآخر انصاف مل گیا۔
عدالت نے مرکزی مجرم کامران کو 25 برس قید بامشقت کی سزا سناتے ہوئے جرم میں شریک دیگر ملزمان کے خلاف بھی سخت قانونی کارروائی کا حکم دے دیا۔
ڈرامے کے اختتام سے قبل ملک بھر میں ایک ہی سوال گردش کر رہا تھا کہ کیا سحر کو انصاف ملے گا؟ کیا ملزم کامران اپنے انجام کو پہنچے گا؟ اور جھوٹی گواہی دینے والوں اور تفتیشی افسر انسپکٹر شفیق کا کیا ہوگا؟ ان تمام سوالات کا جواب ڈرامے کی آخری قسط میں سامنے آ گیا جس نے ناظرین کو گہرے اثرات میں مبتلا کر دیا۔
اس موقع پر جیو نیوز پر خصوصی گفتگو کا اہتمام کیا گیا، جس میں ڈرامے کے رائٹر اور سینئر اینکر پرسن شاہ زیب خانزادہ، مرکزی کردار ”کامران“ ادا کرنے والے نامور اداکار فیصل قریشی اور وکیل کے کردار میں نظر آنے والی اداکارہ آمنہ شیخ شریک ہوئیں۔
گفتگو کے دوران شاہ زیب خانزادہ نے کہا کہ ڈرامے کی ڈائریکشن اور پروڈکشن دیکھ کر اندازہ ہو گیا تھا کہ یہ سیریل ناظرین کی توجہ حاصل کرے گا، تاہم یہ توقع نہیں تھی کہ لوگ اسے مقبولیت کی انتہا تک پہنچا دیں گے۔ اُن کا کہنا تھا کہ جو افراد عام طور پر ڈرامے نہیں دیکھتے تھے، وہ بھی ”کیس نمبر 9“ دیکھنے لگے۔
انہوں نے بتایا کہ پروڈیوسرز عبداللہ کادوانی اور اسد قریشی نے اس پروجیکٹ میں ذاتی دلچسپی لی۔ اسد قریشی نے اسکرپٹ پڑھنے کے بعد کہا کہ وہ یہ ڈرامہ اپنی بیٹی کے لیے بنانا چاہتے ہیں، جبکہ عبداللہ کادوانی نے اسے بڑے اسکیل پر بنانے کا اعلان کیا۔ عدالت کا سیٹ، کہانی، مکالمے اور ہدایتکاری سب غیر معمولی رہی۔
شاہ زیب خانزادہ نے مزید کہا کہ انہیں اکثر مشورہ دیا گیا کہ وہ خود اینکر کے کردار میں نظر آئیں، اور اس کردار پر جو فیڈ بیک ملا وہ ان کے لیے ناقابلِ فراموش ہے۔ ناظرین کا کہنا تھا کہ انہیں محسوس ہوا جیسے شاہ زیب خانزادہ واقعی اپنے شو میں کسی مجرم کا حقیقی انٹرویو کر رہے ہوں۔
اداکار فیصل قریشی نے گفتگو کرتے ہوئے کہا کہ کامران کا کردار ان کے کیریئر کے مشکل ترین کرداروں میں سے ایک تھا۔ اس ڈرامے کے ذریعے ہمارا مقصد معاشرے کو آگاہی دینا تھا۔
انہوں نے جیو ٹی وی، سیونتھ اسکائی، عبداللہ کادوانی اور اسد قریشی کو خراج تحسین پیش کرتے ہوئے کہا کہ اسکرپٹ سے لے کر ہدایتکاری تک ہر شعبے میں غیر معمولی محنت نظر آئی۔
اداکارہ آمنہ شیخ کا کہنا تھا کہ ”کیس نمبر 9“ نہ صرف ڈرامہ انڈسٹری بلکہ پورے معاشرے کے لیے ایک نایاب پروجیکٹ ہے۔ اگر اس ڈرامے کے ذریعے چند خواتین کو بھی اپنے حقوق اور ملکی قوانین سے آگاہی ملی ہے تو یہ ہماری سب سے بڑی کامیابی ہے۔
