فرمان الہی
نماز کے اوقات
ڈیجیٹل نیشنل کارگو ٹریکنگ سسٹم اور ای بلٹی میکنزم کے ڈیزائن مرحلے کا آغاز ہو گیا، اس اقدام کا مقصد اسمگلنگ کی روک تھام اور تجارت میں سہولت فراہم کرنا ہے۔
فیڈرل بورڈ آف ریونیو (ایف بی آر) کے مطابق منصوبے کا مقصد اشیا کی ترسیل کی روایتی کاغذی بلٹی کو الیکٹرانک بلٹی میں تبدیل کرنا ہے، منصوبے کے لیے اسٹریٹیجک فزیبلٹی اسیسمنٹ اور ڈیزائن کے معاہدے پر دستخط ہو گئے۔
ایف بی آر کے مطابق مجوزہ سی ٹی ایس پلیٹ فارم کمرشل کارگو کو ٹریک کرنے کی سہولت فراہم کرے گا، ہر کھیپ کی منفرد اور فوری قابلِ تصدیق کیو آر کوڈ کے ساتھ ای بلٹی جاری کی جائے گی۔
ایف بی آر کے مطابق کسٹمز انفورسمنٹ ٹیمیں قانون کی پابندی اور خلاف ورزی کرنے والے کارگو میں فرق کرسکیں گی۔
چیئرمین ایف بی آر کا کہنا ہے کہ اقدام ہماری ڈیجیٹل اور شفاف معیشت کے وسیع تر وژن کا بنیادی ستون ہے۔ نظام میں جعلی سیلز ٹیکس انوائسز کو ممکن بنانے کی خامیاں دور کر رہے ہیں۔
ممبر کسٹمز آپریشنز نے کہا کہ ہمارا مقصد راستے میں سامان کی فزیکل جانچ پڑتال اور تاخیر کو کم کرکے تجارت میں سہولت فراہم کرنا ہے، سی ٹی ایس ہمارے افسران کو رسک بیسڈ ڈیٹا فراہم کرے گا۔
ایف بی آر کے مطابق اس معاہدے کے تحت ایک جامع تجزیاتی اور تکنیکی ڈیزائن مرحلہ شروع ہو گیا ہے، منتخب کنسلٹنگ فرم کو بین الاقوامی بہترین طریقہ کار کا جائزہ لینے کی ذمہ داریاں سونپی گئی ہیں۔
ایف بی آر کے مطابق یہ اقدام پاکستان کے لاجسٹکس اور ٹرانزٹ ٹریڈ کے قوانین کو عالمی معیار کے مطابق بنائے گا۔
