فرمان الہی
نماز کے اوقات
دی یورپین سٹیزن انیشی ایٹیو کے تحت یورپین یونین کے ایک ملین سے زائد افراد نے اسرائیل کے ساتھ یورپ کے تجارتی معاہدے کے خاتمے کے لیے دستخط کر دیے۔
دستخط کی یہ اپیل یورپین پارلیمنٹ میں موجود لیفٹ الائنس کے علاوہ انسانی حقوق کے لیے کام کرنے والی بے شمار بین الاقوامی تنظیموں نے مل کر کی تھی۔
واضح رہے کہ ’یورپین سٹیزن انیشی ایٹیو ( ECI) ‘ ایک ایسا جمہوری ٹول ہے جو یورپین شہریوں کو یورپین کمیشن سے ان علاقوں میں نئے قوانین یا پالیسیاں تبدیل کرنے کا مطالبہ کرنے کی اجازت دیتا ہے جہاں ای-یو کا دائرہ اختیار ہو۔
اس کے لیے ضروری ہے کہ ایک سال کے اندر اندر یورپین یونین کے 7 مختلف ممالک کے 10 لاکھ افراد اس مطالبے کی حمایت میں دستخط کریں، اسی چیز کو بنیاد بنا کر گزشتہ سال اکتوبر میں یورپی سٹیزن انیشی ایٹو (ECI) کا آغاز یورپی پارلیمنٹ میں موجود بائیں بازو کے اتحاد (ELA) نے سول سوسائٹی کی تنظیموں اور فلسطینی حامی تحریکوں کے ساتھ مل کر کیا تھا۔
اس مہم کے منتظمین مقررہ وقت ختم ہونے سے پہلے 1.5 ملین دستخطوں تک پہنچنا چاہتے ہیں، اس کے بعد قومی حکام کے پاس دستخطوں کی تصدیق کے لیے 3 ماہ کا وقت ہو گا جس کے بعد اس اقدام کو باضابطہ طور پر پیش کیا جا سکتا ہے۔
یورپی یونین کے قوانین کے تحت، یورپی کمیشن اور یورپی پارلیمنٹ کو اب درخواست کا ہر صورت جائزہ لینا ہے۔
اس مہم کے آغاز کے ساتھ دیے گئے متن کے مطابق اسرائیل شہریوں کے قتل اور زخمی ہونے، بڑے پیمانے پر آبادی کی نقل مکانی اور غزہ میں اسپتالوں اور طبی سہولتوں کی منظم تباہی کا ذمے دار ہے۔
اس میں اسرائیل کی بین الاقوامی قانون کے تحت متعدد قواعد و ضوابط کی خلاف ورزی اور نسل کشی کے جرم کو روکنے میں بین الاقوامی عدالت انصاف کے حکم کے مطابق ناکامی کو بھی اسرائیل کے ساتھ تجارتی معاہدے کو معطل کرنے کی بنیاد قرار دیا گیا ہے۔
