فرمان الہی
نماز کے اوقات
کراچی ( سہیل افضل)سندھ کابینہ، کراچی بی آر ٹی ریڈ لائن لاٹ-2منصوبے میں تاخیر پر سابقہ جوائنٹ وینچر معاہدہ ختم کرنے اورترقیاتی کام میں تاخیر اور ناقص کارکردگی پر پرانا کنٹریکٹ منسوخ کرنے کی منظوری،ایف ڈبلیو او کو ہنگامی بنیادوں پر منصوبہ سونپنے کی منظوری، کابینہ نے ٹرانس کراچی کو آف بجٹ ہنگامی فنڈنگ کی بھی منظوری دی تاکہ ایف ڈبلیو او (FWO) کے لئے فوری مالی متحرک کاری کو ممکن بنایا جا سکے، جس نے کوریڈور کو بحال کرنے کے لئے پہلے ہی اہلکار اور بھاری مشینری تعینات کر دی ہے، کابینہ نے انسٹیٹیوٹ آف بزنس ایڈمنسٹریشن (آئی بی اے) ترمیمی بل 2026ء کے مسودے کی منظوری دی ،اب آئی بی اے کو سندھ کے اندر اور باہر نئے کیمپس قائم کرنے کا اختیار مل جائے گا، اقراء یونیورسٹی کو اسلام آباد کیپٹل ٹیریٹری سمیت پورے پاکستان اور بیرون ملک کیمپس اور فیکلٹیز قائم کرنے کی بھی منظوری دی گئی،جے پی ایم سی (JPMC) اور این آئی سی ایچ (NICH) کو چلانے کے لئے نیا قانون منظور،ایس بی او ایس ایس (SBOSS) کا انتظام سندھ آئی ٹی کمپنی کے حوالے کرنے کی منظوری،ماہی گیروں کے لئے مچھلی کے شکار پر سالانہ پابندی میں 15 دن کی نرمی ، کابینہ نےسندھ ورکرز ویلفیئر فنڈ ایکٹ، 2014 کے سیکشن 3(2)(v) میں ترمیم کی منظوری دی،اس منظوری کے بعد ورکرز ویلفیئر بورڈ کے 13 میں 4 ارکان حقیقی مزدوروں کے نمائندوں سے منتخب کرنا ضروری ہو گا ۔ تفصیلات کے مطابق جمعرات کووزیراعلیٰ سندھ سید مراد علی شاہ نے صوبائی کابینہ کے ایک اجلاس کی صدارت کی جس نے ایک جامع ایجنڈے پر دستخط کئے جس میں جناح پوسٹ گریجویٹ میڈیکل سینٹر (JPMC) اور نیشنل انسٹی ٹیوٹ آف چائلڈ ہیلتھ (NICH) کے لئے نئے قوانین سے لے کر پوسٹ گریجویٹ میڈیکل ریزیڈنسی کی مرکزی پالیسی تک شامل ہیں۔ کابینہ نے تکنیکی اور اعلیٰ تعلیم کے قوانین میں ترامیم، سکھر کی ترقی اور جیل کے کھانے کے لئے بڑی الاٹمنٹس، براہ راست کنٹریکٹنگ کے ذریعے کراچی بی آر ٹی ریڈ لائن لاٹ 2 کی بحالی، سندھ بزنس ون اسٹاپ شاپ (SBOSS) کی سندھ آئی ٹی کمپنی کو منتقلی، اسٹریٹجک ٹائیڈ گیج اسٹیشن کے لئے زمین، ورکرز ویلفیئر کی نمائندگی میں تبدیلیاں، مچھلی کے شکار پر سالانہ پابندی میں 15 دن کی نرمی، گندم کی خریداری کے اقدامات اور سندھ کی آٹزم کیئر کی مہارت کو اسلام آباد برآمد کرنے کے لئے مفاہمت کی یادداشت (MoU) کی بھی منظوری دی۔ وزیراعلیٰ ہاؤس میں منعقدہ اجلاس میں صوبائی وزراء، مشیروں، خصوصی معاونین، چیف سکریٹری اور متعلقہ انتظامی افسران نے شرکت کی، اور اجلاس کا آغاز کابینہ کے گزشتہ اجلاس کے منٹس کی باقاعدہ منظوری سے ہوا۔
