فرمان الہی
نماز کے اوقات
ایجبسٹن ٹیسٹ کا دوسرا دن ختم ہوگیا، انگلینڈ کی 320 رنز کی برتری کے سامنے قومی ٹیم نے 2 وکٹوں کے نقصان پر 52 رنز بنالیے، اسے اننگز کی شکست سے بچنے کےلیے مزید 268 رنز درکار ہیں۔
ایجبسٹن ٹیسٹ کے دوسرے دن جب پاکستان نے دوسری اننگز 320 رنز کے خسارے کیساتھ شروع کی تو آغاز تباہ کن تھا، پہلی اننگز میں صفر پر آؤٹ ہونے والے صائم ایوب اولے رابنس کی پہلی ہی گیند پر بروک کو سلپ میں کیچ تھما کر ٹیسٹ میں پیئر لے بیٹھے۔
رابنسن کے اسی اوور کی چوتھی ہی گیند پر عبداللّٰہ شفیق بھی کوئی رن بنائے بغیر روٹ کے ہاتھوں کیچ آوٹ ہوگئے۔
صرف چار گیندوں پر دو وکٹیں گنوانے کے بعد پاکستان ٹیم شدید دباؤ کا شکار تھی، اس موقع پر اوپنر اذان اویس اور سابق ٹیسٹ کپتان شان مسعود نے مورچہ سنبھالا اور دوسرے دن جب بارش کے سبب 27.2 اوورز قبل کھیل ختم کرنے کا اعلان کیا گیا، تو پاکستان نے 2 وکٹ گنوا کر 12.4 اوورز کی بیٹنگ میں 52 رنز بنالئے تھے۔
اذان اویس 29 اور شان مسعود 21 رنز پر ناٹ آوٹ تھے۔ پاکستان کو اننگز کی شکست سے بچنے کے لیے اب بھی 268 رنز کی ضرورت ہے اور اس کی 8 وکٹیں باقی ہیں۔
اس سے قبل ایجبسٹن کرکٹ گراونڈ پر انگلینڈ نے دوسرے دن اپنی پہلی نامکمل اننگز 154 رنز 4 کھلاڑی آؤٹ سے کھیل شروع کی تو دائیں ہاتھ کے بلے باز ڈین لارنس نے جارحانہ انداز اپنایا۔ دوسرے اینڈ سے ہیری بروک نے بھی ان کا بھرپور ساتھ نبھایا۔
پہلا ٹیسٹ کھیلنے والے پاکستانن کے دائیں ہاتھ کے تیز بولر رضا اللّٰہ کے پہلے 2 اوورز میں 25 رنز بنے۔ اس موقع پر کپتان بابراعظم نے دو تجربے کار بولرز محمد علی اور محمد عباس کو گیند تھمائی اور رنز بنانے کی رفتار روکنے کی کوشش کی۔
دوسری جانب کھانے کے وقفے سے قبل پاکستان کو لارنش اور بروک دونوں کی وکٹیں حاصل ہوئیں۔ ہیری بروک 97 گیندوں پر 75 رنز بنا کر رن آؤٹ ہوئے، تو ڈین لارنس کو عمران رندھاوا نے بولڈ کر کے اپنی پہلی ٹیسٹ وکٹ حاصل کی، انہوں نے 82 گیندوں پر 65 رنز کی اننگز کھیلی۔
ساتویں نمبر پر انگلینڈ کے وکٹ کیپر جمی اسمتھ نے 84 گیندوں پر 69 رنز کی اننگز کھیلی۔ 26 سال کے وکٹ کیپر بیٹر کی سیریز میں یہ دوسری نصف سینچری اننگز تھی۔
نویں نمبر پر فاسٹ بولر اولے رابنسن نے 47 گیندیں کھیل کر 50 رنز بنائے۔ یوں انگلینڈ کی پہلی اننگز میں اوپنر ایملیو گے 60، ہیری بروک 75، ڈین لارنس 65، جمی اسمتھ 69 رنز کے بعد دائیں ہاتھ سے بیٹنگ کرنے والے رابنسن پانچویں بیٹر بنے جنہوں نے نصف سنچری اسکور کی۔
انگلینڈ کی اننگز میں چھٹا سب سے بڑا اسکور فاضل رنز کی شکل میں رہا، جس کی تعداد 45 رہی، جس میں سب سے زیادہ 18 رنز وکٹوں کے پیچھے بائی کی شکل میں پہلا ٹیسٹ کھیلنے والے غازی غوری نے دیے۔
انگلینڈ کی پوری ٹیم پہلی اننگز میں 89 اوورز میں 453 رنز بناکر آؤٹ ہوئی۔پاکستان کی جانب سے پہلا ٹیسٹ کھیلنے والے مردان کے دائیں ہاتھ کے تیز بولر رضا اللّٰہ سب سے کامیاب بولر ثابت ہوئے جنہوں نے 23 اوورز میں 148 رنز دے کر 4 وکٹ حاصل کیے جبکہ محمد علی اور عمران رندھاوا نے 2، 2 وکٹیں اپنے نام کیں۔
