فرمان الہی
نماز کے اوقات
برطانیہ میں صدیوں سے سب سے زیادہ مقبول خاندانی نام سمتھ (Smith) اب اپنی برتری کھوتا دکھائی دے رہا ہے، جبکہ جنوبی ایشیائی پس منظر کا خاندانی نام خان (Khan) تیزی سے مقبول ہو رہا ہے اور نئے تجزیے کے مطابق آئندہ برسوں میں پہلے نمبر پر آ سکتا ہے۔
تازہ اعداد و شمار کے مطابق 2025 میں انگلینڈ اور ویلز میں 4,102 نومولود بچوں کا خاندانی نام سمتھ تھا، جبکہ 3,772 بچوں کا خاندانی نام خان ریکارڈ کیا گیا۔ تجزیے میں بتایا گیا ہے کہ سمتھ نام کی تعداد میں سالانہ تقریباً 4 فیصد کمی آ رہی ہے، جبکہ خان نام میں 1.9 فیصد سالانہ اضافہ ریکارڈ کیا گیا ہے۔
رپورٹ کے مطابق تبدیلی صرف خاندانی ناموں تک محدود نہیں بلکہ بچوں کے پہلے ناموں میں بھی نمایاں رجحانات سامنے آئے ہیں۔ محمد برطانیہ، خصوصاً لندن سمیت کئی علاقوں میں، نومولود بچوں کے مقبول ترین ناموں میں شمار ہوتا ہے۔ یورپ کے دیگر ممالک میں بھی اس نام کی مقبولیت میں مسلسل اضافہ دیکھا جا رہا ہے۔
ناروے کے سرکاری نشریاتی ادارے این آر کے (NRK) نے 2014 میں رپورٹ کیا تھا کہ محمد اوسلو میں بھی سب سے عام نام بن گیا تھا۔
ماہرین کا کہنا ہے کہ خاندانی اور ذاتی ناموں کے یہ بدلتے رجحانات برطانیہ میں آبادی کے بڑھتے ہوئے نسلی و ثقافتی تنوع، امیگریشن اور مختلف برادریوں کی مضبوط ہوتی موجودگی کی عکاسی کرتے ہیں۔
