اورنج لائن ٹرین

12 دسمبر ، 2019

آبادی کے لحاظ سے پانچویں بڑے ملک پاکستان کا ہر شہر جس بے ہنگم ٹریفک اور آلودگی کا شکار ہے یہ محتاجِ وضاحت نہیں، تاہم پیدا شدہ مسائل سے نمٹنے کے لیے سر دست لاہور، کراچی، ملتان، پشاور اور راولپنڈی میں متعلقہ صوبائی حکومتوں نے بعض اقدامات کئے ہیں۔ ان میں سے ایک لاہور کے شہریوں کیلئے فاصلے اور وقت کو سمیٹنے کی غرض سے اورنج لائن ٹرین منصوبہ اپنی تکمیل کے بعد منگل کے روز آزمائشی مرحلے میں داخل ہو گیا ہے جو آئندہ تین ماہ جاری رہے گا۔ اس دوران مطلوبہ استعداد اور اہداف کو سامنے رکھتے ہوئے ہر طرح کے تکنیکی پہلو اور ٹرین سروس کا بغور جائزہ لیا جائے گا۔ گزشتہ دنوں آزمائشی سروس کے متذکرہ افتتاح کی تاریخیں تبدیل کرنے کے حوالے سے یہ بات سامنے آئی ہے کہ 4اکتوبر کو متعلقہ کمپنی کے انجینئرز نے ٹرین کے آخری اسٹاپ علی ٹائون رائیونڈ کے قریب استون نمبر 338کے اوپر اور اردگرد ٹریک کے کنکریٹ بیڈ پر خطرناک دراڑیں دیکھیں جس سے یہ ٹرائل خطرناک ثابت ہو سکتا تھا تاہم اس کی ہنگامی مرمت کر دی گئی ہے جس کی روشنی میں مزید ضروری ہوگیا ہے کہ آئندہ تین ماہ کی آزمائشی سروس کے دوران 27کلومیٹر کے اس ٹریک کے ہر پہلو کا باریک بینی سے مکمل جائزہ لیتے ہوئے شہریوں اور روٹ کے ایک ایک انچ کی حفاظت کو یقینی بنایا جائے۔ اسی طرح پشاور میں ریپڈ بس ٹرانزٹ اور کراچی میں گرین لائن منصوبے جو اپنی تکمیل کے مراحل میں ہیں۔ متعلقہ حکومتوں کی مسلسل نگرانی کے متقاضی ہیں مزید برآں تاخیر کے باعث وقت گزرنے کے ساتھ ساتھ ان کا تخمینہ بھی بڑھ جاتا ہے یہاں کے شہریوں کو حتی الوسع پٹرول کی ہوشربا قیمتوں، ماحولیاتی آلودگی سے نمٹنے، وقت اور فاصلوں کو کم سے کم کرنے میں ہر ممکن ریلیف ملنا چاہئے۔

اداریہ پر ایس ایم ایس اور واٹس ایپ رائے دیں00923004647998

تازہ ترین