• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

نامور شاعر ابن انشاء کا یومِ پیدائش کل منایا جائے گا

تازہ ترین
خاص رپورٹ
14 جون ، 2020

ابن انشاء کی مقبول عام غزل ’انشاء جی اٹھو اب کوچ کرو ‘آج بھی سننے والوں کے کانوں میں رس گھولتی ہے


اردو زبان کے عظیم شاعر اور نثر نگار ابن انشاءکا 93واں یومِ پیدائش پندرہ جون کو منایا جائے گا۔

بھارتی شہر جالندھر کے ایک گاؤں میں 15 جون 1927ء کو پیدا ہونے والے ابن انشاء کا اصل نام شیر محمد تھا۔ ریڈیوپاکستان سمیت کئی سرکاری اداروں سے وابستہ رہنے کے ساتھ ساتھ انہوں نے کچھ عرصہ اقوام متحدہ میں بھی پاکستان کی نمائندگی کی اور اس دوران کئی یورپی و ایشیائی ممالک کے دورے کئے۔

ابن انشا نے متعدد سفر نامے بھی تحریر کیے جو کہ بے پناہ مقبول ہوئے جن میں، چلتے ہو تو چین کو چلیے، ابن بطوطہ کے تعاقب میں، آوارہ گرد کی ڈائری اور دنیا گول ہے قابل ذکر ہیں۔

ابن انشاء کی کتب خمار گندم اور اردو کی آخری کتاب ان کے کالموں پر مشتمل ہے جو کہ بے پناہ مقبول ہوئیں۔ وہ غزل گو شاعر بھی تھے ان کی مقبول عام غزل ’انشاء جی اٹھو اب کوچ کرو ‘آج بھی سننے والوں کے کانوں میں رس گھولتی ہے۔

ان کے سفر ناموں میں طنز و مزاح کی رنگین کرنیں ان کے اسلوب کو وہ تازگی اور شگفتگی عطاکرتی ہیں کہ جس کے باعث وہ اس میدان میں بے مثال ہیں۔

اردو ادب کا یہ گراں قدر سرمایہ 11 جنوری 1978ء کو علالت کے باعث لندن میں انتقال کر گیا اورکراچی کے پاپوش نگر قبرستان میں سپردخاک کردیا گیا۔

افسوس کہ اردو شعر و ادب کی یہ معروف شخصیت آج ہم میں نہیں مگر انہوں نے اپنے قلم سے اردو ادب کے اُفق پرایسے انمٹ نقوش چھوڑے ہیں جو رہتی دنیا تک لوگوں کو ان کی یاد دلاتے رہیں گے۔

تازہ ترین