فرمان الہی
نماز کے اوقات
بھارت کے رئیلٹی شو بگ باس کے سیزن 14 کا حصہ بننے والی بالی ووڈ اداکارہ راکھی ساونت نے انکشاف کیا ہے کہ اُنہوں نے اپنے دوست سے اپنی ماں کے علاج کے لیے پیسے مانگے تھے اور رقم کے بدلے دوست نے اُنہیں جنسی ہراساں کیا۔
بالی ووڈ اداکارہ راکھی ساونت آئے دن اپنے متنازع بیانات کی وجہ سے سرحد کے دونوں پار خبروں کی زینت بنی رہتی ہیں، کبھی وہ اپنے شوہر سے متعلق انکشافات کرتی دکھائی دیتی ہیں تو کبھی اپنی ذاتی زندگی سے متعلق۔
اب راکھی ساونت نے بگ باس سیزن 14 کی حالیہ قسط میں جنسی ہراسانی کا شکار ہونے کا انکشاف بھی کیا ہے۔
راکھی ساونت نے بگ باس سیزن 14 کے اُمیدوار راہول ویدیا کے ساتھ دوران گفتگو انکشاف کیا کہ ’جب اُنہوں نے بھارتی فلم انڈسٹری میں اپنے کیرئیر کا آغاز کیا تھا تو اُن دنوں اُن کی والدہ کو دل کا دورہ پڑا تھا۔‘
بالی ووڈ اداکارہ نے کہا کہ ’اُس وقت میری عُمر کافی کم تھی، مجھے جیسے ہی والدہ کی طبیعت کے بارے میں معلوم ہوا تو، میں فوراََ اسپتال پہنچی جہاں ڈاکٹرز نے کہا کہ علاج کے لیے ایک بھاری رقم درکار ہے۔‘
اُنہوں نے کہا کہ ’میں نے اپنے اس مشکل وقت میں اپنے ایک دوست سے مدد مانگی اور اُس سے کہا کہ مجھے کچھ رقم اُدھار دے دو۔‘
راکھی ساونت نے اپنی بات جاری رکھتے ہوئے کہا کہ ’دوست نے مجھ سے اگلے روز ملنے کو کہا، میں اُس سے پاس گئی تو اُس نے مجھے رقم دی جس پر میں نے کہا کہ میں بہت جلد یہ رقم واپس کردوں گی۔‘
بالی ووڈ اداکارہ نے کہا کہ ’میرے دوست نے کہا کہ نہیں پیسے واپس کرنے کی ضرورت نہیں، ماں سے بڑھ کر کچھ نہیں اور پھر اُس نے اپنی باتوں سے میرا دل جیت لیا۔‘
اُنہوں نے کہا کہ ’اُس کے بعد میرے دوست نے مجھ سے کہا کہ تُم مجھے بدلے میں کیا دو گی؟ تو میں نے کہا میرے پاس تو کچھ نہیں، میں تمہیں کیا دوں۔‘
راکھی ساونت نے جذباتی ہوتے ہوئے کہا کہ ’اس سب کے بعد میرے ہی دوست نے مجھے اپنی گاڑی میں جنسی ہراساں کرنے کی کوشش کی، میں چیخی چلائی، جس کے بعد وہ مجھے سڑک پر پھینک کر چلا گیا۔‘
بالی ووڈ اداکارہ نے راہول ویدیا سے مخاطب ہوتے ہوئے کہا کہ ’میں نے یہ بات کبھی کسی کو نہیں بتائی کیونکہ میں جب اُس واقعے کو یاد کرتی ہوں تو میری روح کانپ اُٹھتی ہے۔‘
واضح رہے کہ اس سے قبل راکھی نے انکشاف کیا تھا کہ ان کے شوہر پہلے ہی شادی شدہ تھے اور ایک بچے کے باپ بھی ہیں جس کے بارے میں انہیں شادی کے بعد پتہ چلا۔
راکھی نے گزشتہ برس جولائی میں برطانیہ میں مقیم بزنس مین سے شادی کی تھی۔
