عمیر وقار مردوں سے دوستی کیوں نہیں کرتے؟

پاکستان کے معروف ہیئر اسٹائلسٹ اور میک اپ آرٹسٹ عمیر وقار نے حال ہی میں بہت سے سوالوں کے جواب دیتے ہوئے اس راز سے بھی پردہ اٹھایا ہے کہ وہ مردوں سے دوستی کیوں نہیں رکھتے ہیں۔

عمیر وقار کی جانب سے گزشتہ شام ‘Ask me a question’ سیشن کا آغاز کیا گیا، سوشل میڈیا پلیٹ فارم انسٹا گرام پر اُن کی جانب سے یہ اسٹوری لگانا ہی تھا کہ عمیر وقار کے ہزاروں فالوورز کی جانب سے فوراً سوالوں کا تانتا بندھ گیا۔

عمیر وقار نے سوالوں کے جوابات دیتے ہوئے بتایا کہ اُن کی پسندیدہ ماڈل عائزہ خان ہیں۔

 انہوں نے مزید بتایا کہ ’وہ بہت ساری ماڈلز کے ساتھ کام کر چکے ہیں اور اُن سب میں عاجزی اور انکساری رکھنے والی ماڈل عائزہ خان، مومل شیخ، صبور علی اور کبریٰ خان ہیں۔

عمیر وقار سے سوال پوچھا گیا کہ اُنہیں آج تک سب سے برے رویئے والی اداکارہ کونسی لگی ہیں ؟ جس کا جواب دیتے ہوئے عمیر وقار کا کہنا تھا کہ ثناء جاوید بدتمیز اداکارہ ہیں، انہوں نے اپنے مداحوں کو مشورہ دیا کہ ٹی وی پر نظر آنے والی ہر چیز پر یقین نہ کر لیا کریں۔

ایک سوال کا جواب دیتے ہوئے عمیر وقار کا کہنا تھا کہ وہ اداکارہ صبا قمر اور اقراء عزیز کے ساتھ کام کرنا چاہتے ہیں۔

اس سیشن کے دوران ایک انسٹا گرام صارف کی جانب سے لکھا گیا کہ ’مردوں سے دوستی کر لو۔‘

اس کا جواب دیتے ہوئے عمیر وقار کا کہنا تھا کہ ’مردوں سے دوستی کرنے کا فائدہ نہیں، مرد صرف یہی بولتے رہتے ہیں کہ بچی سے ملوا دو۔‘

اُن کا کہنا تھا کہ مرد اُن کے کبھی وفادار دوست نہیں رہے ہیں ، اسی لیے وہ صرف خواتین کو دوست بناتے ہیں۔