اسکواڈ سے ورلڈ کپ میں متاثر کن کارکردگی کی امید ہے، چیف سلیکٹر

06 ستمبر ، 2021

قومی کرکٹ ٹیم کے چیف سلیکٹر محمد وسیم کا کہنا ہے کہ اسکواڈ کا انتخاب کرتے ہوئے ٹی ٹوئنٹی کرکٹ کے جدید دور کے برانڈ کو اپنانے اور اپنی تمام بنیادوں کا احاطہ کرنے کی کوشش کی ہے، امید ہے یہ اسکواڈ آئی سی سی مینز ٹی 20 ورلڈ کپ میں متاثر کن کارکردگی کا مظاہرہ کرے گا۔

چیف سلیکٹر محمد وسیم نے کہا کہ ہم نے ان کھلاڑیوں کی صلاحیتوں ، مہارتوں اور تجربے پر اعتماد کیا ہے جو دباؤ کے باوجود بین الاقوامی ٹورنامنٹ میں پرفارم کرنے کی صلاحیت رکھتے ہیں۔

محمد وسیم کا کہنا ہے کہ یقیناََ آصف علی اور خوشدل شاہ کے نمبرز متاثر کن نمبر نہیں لیکن ان کی زبردست صلاحیتوں پر کسی کو شک نہیں، یہ دونوں کھلاڑی مڈل آرڈر بلے بازوں کے لیے ہمارے دستیاب پول میں بہترین ہیں اور یقین ہے کہ یہ دونوں اپنی عمدہ کارکردگی سے ہمیں مڈل آرڈر میں درپیش مشکلات کا حل دیں گے۔

چیف سلیکٹر کا مزید کہنا ہے کہ ان دونوں کے علاوہ کپتان بابر اعظم ، محمد حفیظ ، محمد رضوان اور صہیب مقصود قومی کرکٹ ٹیم کی بیٹنگ لائن اپ کا اہم حصہ ہوں گے، جبکہ عماد وسیم ، محمد نواز اور شاداب خان کی صورت میں ہمارے پاس تین اعلیٰ معیار کے اسپنرز موجود ہیں۔

انہوں نے مزید کہا کہ ہم سب جانتے ہیں کہ اعظم خان ایک جارحانہ اور بیٹسمین ہیں، جو وکٹ کپینگ بھی کرتے ہیں ، جس کی وجہ سے انہیں سرفراز احمد کی جگہ اسکواڈ میں شامل کیا گیا ہے۔

محمد وسیم جونیئر کو تیز رفتاربولنگ اور بڑے شاٹس مارنے کی صلاحیت کی وجہ سے فہیم اشرف پر ترجیح دی گئی ہے، محمد وسیم جونیئر فاسٹ بولنگ یونٹ کو مضبوط کریں گے ، جس میں حارث رؤف ، حسن علی ، محمد حسنین اور شاہین شاہ آفریدی بھی شامل ہیں۔

تازہ ترین