سندھ ہائی کورٹ نے پولیس اہلکار آفتاب شاہ قتل کیس کی سماعت کرتے ہوئے سزا یافتہ ملزمان کی اپیلوں پر فیصلہ سنا دیا اور عدم شواہد کی بناء پر شعیب عرف شاہو اور فہد بن شکیل کی اپیل منظور کرتے ہوئے دونوں ملزمان کو رہا کرنے کا حکم دے دیا۔
عدالتِ عالیہ نے اپنے حکم میں کہا ہے کہ پولیس نے آلۂ قتل برآمد نہیں کیا، نہ ہی جائے وقوع سے خول برآمد کیئے تھے۔
خصوصی عدالت نے ملزمان کو اپریل میں عمر قید اور 3، 3 لاکھ روپے جرمانے کی سزا سنائی تھی۔
واضح رہے کہ جولائی 2011ء میں ایم کیو ایم نے ہڑتال کا اعلان کر رکھا تھا، الفلاح تھانے کی پولیس موبائل ملت روڈ ملیر پر ایمرجنسی ڈیوٹی پر تھی۔
پولیس کے مطابق پولیس جیسے ہی جامعہ ملیہ پہنچی تو پولیس موبائل پر اچانک فائرنگ شروع ہو گئی، فائرنگ کے نتیجے میں پولیس اہلکار آفتاب شاہ گولی لگنے سے شہید ہو گیا تھا۔
ملزمان کے خلاف الفلاح تھانے میں قتل کا مقدمہ درج کیا گیا تھا۔