گورنر سندھ عمران اسماعیل کا کہنا ہے کہ چوہے تین نہیں ہیں، پانچ ہیں، دو لندن میں چھپے ہوئے ہیں۔
وفاقی دارالحکومت اسلام آباد میں پاکستان تحریک انصاف (پی ٹی آئی) کے امر بالمعروف جلسے سے خطاب کرتے ہوئے گورنر سندھ عمران اسماعیل نے کہا کہ تین چوہے نہیں ہیں، پانچ ہیں، دو لندن میں چھپے ہوئے ہیں۔
انہوں نے پھر نظم کے انداز میں کہا کہ ’پانچ چوہے گھر سے نکلے کرنے چلے شکار، ایک لندن میں جاکر ہوگیا بیمار۔‘
مزید کہا کہ ’چار چوہے گھر سے نکلے کرنے چلے شکار، ایک چوہا چلا گیا چین، باقی رہ گئے تین۔‘
عمران اسماعیل پھر دہرایا کہ ’تین چوہے گھر سے نکلے کرنے چلے شکار، تین کو تو خان ویسے ہی مسل کر پھینک دیتا ہے۔‘
وفاقی وزیر برائے پورٹ اینڈ شپنگ علی زیدی نے سابق صدر پاکستان آصف علی زرداری پر تنقید کرتے ہوئے کہا ہے کہ زرداری ٹولا سندھ کی زمینیں ہڑپ کر رہا ہے، اسکول تباہ کر دیے، چوہا مافیا کا نام آصف زرداری ہے۔
علی زیدی نے کہا کہ زرداری ٹولے نے سندھ کے اسپتال تباہ کردیے، پورا سندھ تباہ کردیا، عمران خان کی قیادت میں چوہے کا شکار کر کے دکھاؤں گا۔