فرمان الہی
نماز کے اوقات
پاکستان پیپلز پارٹی (پی پی پی) کے رکن قومی اسمبلی عبدالقادر پٹیل نے کہا ہے کہ مودی شکست خوردہ ہے وہ کسی بھی حد تک جا سکتا ہے، ہمیں چوکنا رہنا چاہیے۔
قومی اسمبلی کے اجلاس کے دوران اظہارِ خیال کرتے ہوئے انہوں نے کہا کہ اللّٰہ کا شکر ہے کہ پاکستان کو اس صدی کی عظیم فتح ملی۔ کل تک دنیا سوچ رہی تھی اور اس ایوان میں بھی خیالات ابھرے کہ ہم کسی سے کمتر ہیں۔
عبدالقادر پٹیل کا کہنا ہے کہ ملک کی ساری سیاسی قوتوں نے اتحاد کا مظاہرہ پیش کیا۔ افواج پاکستان، سپہ سالار کو خراج تحسین پیش کرتا ہوں کہ پاکستان کو تاریخی کامیابی دلائی، بھارت نہیں پوری دنیا پر ثابت کر دیا کہ ہم پر جنگ مسلط کی گئی تو پھر ہمارے پاس وطن یا کفن ہے۔
انہوں نے کہا کہ میں کل سرینڈر مودی کی تقریر سن رہا تھا، مودی کہہ رہا تھا کہ ہم ایٹمی بلیک میلنگ میں نہیں آئیں گے۔
عبدالقادر پٹیل کا کہنا تھا کہ ہم بلیک میل نہیں کر رہے تھے، ہماری یہ وارننگ ہے کہ پاکستان کو میلی آنکھ سے نہ دیکھنا۔
ان کا مزید کہنا تھا کہ بھارت نے کیا دہشت گردی دیکھی ہے، ہم تو ایک لاکھ سے زائد لوگ شہید کرا بیٹھے ہیں۔ ہماری مسجدیں، امام بارگاہیں بھارت کی پراکسی کی وجہ سے غیرمحفوظ ہیں۔ تحریکیں، ٹارگٹ کلنگ، دہشت گردی کراچی کا امن برباد کرنا سب کا تانا بانا بھارت سے ملتا ہے۔
پیپلز پارٹی کے رکن قومی اسمبلی نے یہ بھی کہا کہ ہمارے پاس تو ثبوت بھی ہے کہ بھارت پاکستان میں دہشت گردی کرواتا ہے، مودی اپنی فیس سیونگ کے لیے کسی بھی خطرناک حد تک جا سکتا ہے۔ مودی اپنی سیاسی شہرت کےلیے لاشیں مانگتا ہے، لاشوں پر سیاست کرتا ہے۔
