اوپیک پلس کی جانب سے تیل کی پیداوار میں کمی پر امریکہ نے سعودی عرب کے خلاف جوابی آپشنز کا عندیہ دے دیا۔
اس بات کا انکشاف امریکی وزیر خارجہ انٹونی بلنکن نے لاطینی امریکہ کے ملک پیرو کے دارالحکومت لیما میں پریس کانفرنس کے دوران کیا۔
سیکریٹری بلنکن نے اوپیک پلس کا تیل کی پیداوار میں کمی کے فیصلے کو تنگ نظری اور مایوس کن قرار دیا۔ جس کے بعد امریکہ نے سعودی عرب کے ساتھ تعلقات کے حوالے سے مختلف جوابی آپشنز پر غور کرنا شروع کر دیا۔
تاہم انہوں نے کہا کہ امریکہ اس حوالے سے کوئی ایسا فیصلہ نہیں کرے گا جس سے اس کے مفادات کو نقصان پہنچے اور کوئی قدم اٹھانے سے پہلے اسٹیک ہولڈرز سے مشاورت کی جائے گی۔
وزیر خارجہ کا بیان امریکی ایوان نمائندگان کے اجلاس کے چند گھنٹوں بعد سامنے آیا ہے، جس میں تین اراکین نے سعودی عرب اور متحدہ عرب امارات میں موجود امریکی فوجی اثاثوں کے مکمل خاتمے کا مطالبہ کیا ہے۔