جمال احمد جمال
کرم خدا کا ہے بے شک بصورتِ قرآں
ہے بے مثال ازل سے ہی حکمتِ قرآں
خدا کے حکم سے روشن ہے زندگی کا نظام
سو اُس کے حرفِ سخن میں ہے نکہتِ قرآں
ہر ایک حرف کی تابش سے ہے نگارِ سخن
بلندیوں پہ درخشاں ہے عظمتِ قرآں
کہ حرف قرآں سے ہوتا ہے معجزوں کا ظہور
نبیؐکی ذات سے نسبت ہے، نسبتِ قرآں
حروف قرآں پہ ہوتا ہے خوشبوئوں کا نزول
کہ دل میں ذکر سے بڑہتی ہے قربتِ قرآں
نظامِ زیست دیا ہے خدا نے قرآں میں
ہے خود حقیقتِ قرآں ہی نعمتِ قرآں
لکھے گئے ہیں جو قرآں میں راستی کے اصول
وہی ہے رب کی ہدایت، ہدایتِ قرآں
خدا نے خودہی سکھائے جو بندگی کے طریق
ازل سے اس میں ہے پنہاں امانتِ قرآں
خدا کا لطف و کرم ہو جمال شاملِ حال
زباں پہ تیری مسلسل ہو مدحتِ قرآں