پاکستان اسپورٹس بورڈ (پی ایس بی) نے اسلام آباد کے جناح فٹبال اسٹیڈیم کی لائٹس کے حوالے سے پی ایف ایف کی جانب سے کرائی گئی جائزہ رپورٹ کو ماننے سے انکار کردیا اور لائٹس چیک کرنے کیلئے آزاد تجزیہ کرانے کی پیشکش کردی ہے۔
اسلام آباد کے جناح فٹبال اسٹیڈیم میں 6 جون کو پاکستان اور سعودی عرب کے درمیان فیفا ورلڈ کپ کوالیفائر میچ کھیلا جانا ہے لیکن اسٹیڈیم پر لگائی جانیوالی لائٹس کے معیار پر سوالیہ نشان ہے۔
پی ایف ایف نے ایک پرائیوٹ کمپنی سے لائٹس کا لیول چیک کرایا جس کے بعد پی ایس بی کو آگاہ کیا کہ لائٹس فیفا کے طے معیار سے کم ہے۔
پی ایف ایف کی رپورٹ میں نشاندہی کی گئی تھی کہ لائٹس میں عدم تسلسل ہے اور گول پوسٹ کے اطراف میں روشنی کم ہے تاہم پی ایس بی کی جانب سے پی ایف ایف کو بھیجے گئے خط میں دعوی کیا گیا ہے کہ اس کی اپنی کرائی جانیوالی ٹیسٹنگ کے مطابق گراونڈ میں لائٹس 1600 سے 2650 کے درمیان رہی ہے۔ اے ایف سی اور فیفا قوانین کے مطابق گراؤنڈ پر عمودی لکس کم از کم 1200 جبکہ غیر عمودی لکس 2400 متوازی طور پر ہونا چاہیے۔
پی ایس بی نے پی ایف ایف سے کہا ہے کہ وہ فیفا اور اے ایف سی کا معیار شیئر کرے جس کی بنیاد پر ایک آزاد کمپنی سے دوبارہ روشنی کے معیار کو ٹیسٹ کرایا جائے گا اور اگر ضرورت پڑی تو اس کو بہتر کردیا جائے گا۔ خط میں پی ایس بی نے پی ایف ایف سے مکمل تعاون کی یقین دہانی بھی کرائی ہے۔