چیئرمین کشمیر کونسل یورپ علی رضا سید کا کہنا ہے کہ دنیا میں امن کے فروغ کے لیے یورپی یونین کا کردار بہت اہم ہے اور اسی لیے 27یورپی ممالک کی یہ بااثر اور طاقتور تنظیم مسئلہ کشمیر کے پُرامن حل کے لیے اپنا مؤثر کردار ادا کرسکتی ہے۔
اسلام آباد کے مقامی ہوٹل میں چیئرمین کشمیر کونسل یورپ علی رضا سید کے اعزاز میں استقبالیے کی تقریب کا انعقاد کیا گیا۔ تقریب کے میزبان سینئر صحافی محسن رضا خان تھے جبکہ نظامت کے فرائض وائس آف امریکہ کے صحافی علی فرقان نے انجام دیئے۔
اس موقع پر جو دانشور، صحافی اور اینکر پرسنز شریک ہوئے ان میں پاکستان فیڈرل یونین آف جرنلسٹس کے صدر افضل بٹ، پروفیسر محمد سعید، پروفیسر طاہر نعیم ملک، دی نیوز انٹرنیشنل کے ایڈیٹر عامر غوری، صباح نیوز کے ایڈیٹر انچیف شکیل ترابی، نوائے وقت کے ایڈیٹر عزیز علوی، نیوز ٹوڈے کے ایڈیٹر عرفان غوری، جموں و کشمیر کے ایڈیٹر ان چیف عامر محبوب، بلوم پاکستان کے منیجنگ ایڈیٹر شاہد میتلا، جی ٹی وی کے ڈائریکٹر نیوز قیوم بخاری، ڈائریکٹر نارتھ آج نیوز محمد عادل، ہم نیوز کے اینکر ثمر عباس، پی ٹی وی کی اینکر مہوش قریشی، جی ٹی وی کے اینکر امیر عباس، سُنو ٹی وی کے اینکر اطہر کاظمی، معروف اینکر عاصمہ اقبال، جی ٹی وی کے اینکر پروفیسر متین حیدر، فخر یوسف زئی، جی ٹی وی کے خواجہ متین، روز ٹی وی کی آرزو کاظمی، پی ٹی وی کے اینکر یاسر رحمٰن، نیشنل پریس کلب کی جوائنٹ سیکرٹیری سحرش قریشی، سید ضیغم شاہ کاظمی اور راجہ فیصل قابل ذکر ہیں۔
کشمیرکونسل یورپ کے چیئرمین علی رضا سید نے تقریب کے شرکاء سے خطاب کرتے ہوئے بتایا کہ ہم نے یورپی پارلیمنٹ کی حالیہ انتخابی مہم کے دوران مسئلہ کشمیر بالخصوص مظلوم کشمیریوں کے انسانی حقوق کو اجاگر کرنے کے لیے بھرپور کوشش کی ہے۔ ہم نے مختلف یورپی ممالک کی سیاسی جماعتوں کے رہنماؤں، اہم یورپی شخصیات اور خاص طور پر انتخابات میں حصہ لینے والے متحرک امیدواروں سے ملاقاتیں کرکے انہیں مسئلہ کشمیر کے پس منظر اور مقبوضہ کشمیر کی موجودہ صورتحال سے آگاہ کیا ہے۔
انہوں نے کہاکہ یورپی پارلیمنٹ میں نئے منتخب ہونے والے اراکین میں سے اکثریت نئے چہروں پر مشتمل ہے اور ان کے ساتھ ساتھ کئی پرانے سیاستدان بھی پارلیمنٹ میں ہیں۔
چیئرمین کشمیر کونسل ای یو نے کہا کہ ہم نے مختلف یورپی حلقوں اور سیاسی جماعتوں کے رہنماؤں کو بتایا کہ مسئلہ کشمیر عالمی سطح پر ایک تسلیم شدہ مسئلہ ہے جو گزشتہ ساڑھے 7 عشروں سے حل طلب ہے۔ نیز مقبوضہ کشمیر کی صورتحال انتہائی گھمبیر ہے اور بھارت نے وہاں 8 لاکھ فوج تعینات کی ہوئی ہیں جو کالے قوانین کو استعمال کرکے لوگوں پر ظلم و ستم کررہی ہے۔
علی رضا سید نے بتایاکہ ان کی کوشش ہے کہ نئے اراکین یورپی پارلیمنٹ مسئلہ کشمیر سے زیادہ سے زیادہ آگاہ ہوسکیں تاکہ وہ مظلوم کشمیریوں کی حمایت میں آواز بلند کرسکیں اور اس سلسلے میں بھارت پر عالمی برادری کا دباؤ بڑھائے۔
انہوں نے کہاکہ ہم بھارت کے عوام کے خلاف نہیں بلکہ جموں و کشمیر کے متعلق بھارتی پالیسیوں اور منفی رویے اور خاص طور پر جموں و کشمیر کے بڑے حصے پر بھارتی قبضے کے خلاف ہیں۔ بھارت نے کشمیریوں کو ان کا حقِ خود ارادیت دینے کا وعدہ کیا تھا جو ابھی تک پورا نہیں کیا گیا۔ بھارت ناصرف طویل عرصے سے جموں و کشمیر کے ایک بڑے حصے پر ناجائز قابض ہے بلکہ اپنے اس غیرقانونی قبضے کو برقرار رکھنے کے لیے وہ کشمیری عوام پر ظلم و ستم ڈھا رہا ہے۔
علی رضا سید نے کہاکہ بھارت طاقت کے ذریعے کشمیریوں کی تحریک کو دبا نہیں سکتا۔ کشمیریوں کی تحریک ضرور کامیاب ہوگی اور ایک دن انہیں آزادی ضرور نصیب ہوگی۔
انہوں نے کہا کہ یورپ میں کشمیر پر آگاہی کے لیے گزشتہ کئی برسوں سے کشمیر کونسل یورپ نے 1 ملین دستخطی مہم شروع کر رکھی ہے جسکے اچھے اثرات مرتب ہوئے ہیں۔
چیئرمین کشمیر کونسل ای یو نے میڈیا اور سوشل میڈیا سے وابستہ افراد کا شکریہ ادا کیا جو مسئلہ کشمیر کو اجاگر کرنے کے لیے اہم کردار ادا کررہے ہیں۔
انہوں نے تقریب کے میزبان اور تقریب میں شریک مہمانوں کا شکریہ ادا کیا جو اپنی مصروفیات سے وقت نکال کر تقریب میں شریک ہوئے۔
تقریب کے دوران پاکستان فیڈرل یونین آف جرنلسٹس کے صدر افضل بٹ نے کشمیر کونسل ای یو کی آگاہی مہم کی تعریف کی اور کہاکہ علی رضا سید کی سربراہی میں کشمیر کونسل یورپ نے مسئلہ کشمیر کو اجاگر کرنے اور خاص طور پر کشمیریوں کے حقوق کی پاسداری کے لیے اہم کردار ادا کیا ہے۔
انہوں نے بتایا کہ چیئرمین کشمیر کونسل ای یو کی یورپ میں کشمیر کے لیے خدمات بے لوث ہیں اور وہ یورپی پارلیمنٹ سمیت یورپی اداروں میں حقیقی طور پر کشمیریوں کے حقوق کا دفاع کررہے ہیں۔
تقریب کے میزبان محسن رضا خان نے بھی تقریب کے مہمانِ خصوصی علی رضا سید اور دیگر شرکاء کا شکریہ ادا کیا۔
انہوں نے مسئلہ کشمیر کے حوالے سے کشمیر کونسل یورپ کی جاری کوششوں کی تعریف کی اور کہا کہ علی رضا سید کی یورپ میں کشمیرکاذ کے لیے خدمات قابل ستائش ہیں۔