امریکی وزارت خارجہ نے ایک بیان میں یمن کی بندرگاہ باب المندب میں متحدہ عرب امارات کے ایک بحری جہاز پر حوثی باغیوں کے حملے کی شدید الفاظ میں مذمت کی ہے۔
عرب ٹی وی کے مطابق امریکی محکمہ خارجہ کے ترجمان جان کربی نے ایک بیان میں کہا ہے کہ ان کا ملک باب المندب بندرگاہ پر اماراتی بحری جہاز پر حوثیوں کے حملے کو سنجیدگی سے دیکھتا ہے۔
ان کا کہنا تھا کہ امریکا باب المندب سے تمام جہازوں کی بہ حفاظت اور پرامن آمد ورفت کا پابند ہے اور کسی کو وہاں سے گذرنے والے جہازوں کو نشانہ بنانے کی اجازت نہیں دی جاسکتی ہے۔
جان کربی نے یمنی باغیوں سے مطالبہ کیا کہ وہ بحری جہازوں اور امدادی قافلوں پر حملوں کا سلسلہ فوری طور پر بند کریں۔ادھر سعودی عرب کی قیادت میں قائم عرب اتحاد نے بھی خبردار کیا ہے کہ حوثی باغی اور علی صالح ملیشیا کے جنگجو باب المندب میں عالمی جہاز رانی کی راہ میں رکاوٹ بن سکتے ہیں۔
عرب اتحاد کی جانب سے یہ انتباہ اس وقت کیا گیا جب یمنی باغیوں نے جنگ سے زخمیوں کو لے جانے اور امدادی سامان لے کر آنے والے اماراتی جہاز پر حملہ کرکے اسے نقصان پہنچایا تھا۔