ایران کے وزیرِ خارجہ جواد ظریف نے کہا ہے کہ انھیں امید ہے کہ یمن کا تنازع تہران اور ریاض کے درمیان براہِ راست تصادم کا باعث نہیں بنے گا۔
امریکی ٹی وی کے مطابق منگل کو جواد ظریف نے نیویارک میں اقوامِ متحدہ کی سلامتی کونسل برائے خارجہ امور کو بتایا کہ یمن میں جاری خانہ جنگی سے کسی کو فائدہ نہیں پہنچ رہا ہے۔
ان کا مزید کہنا تھا کہ یمن تنازعے نے ایک اشتعال انگیز انسانی بحران پیدا کیا جس میں تہران اور ریاض مختلف پہلوؤں کی حمایت کر رہے ہیں۔ایرانی وزیر خارجہ جواد ظریف کے مطابق یمن اور شام کے تنازعے پر اتفاق رائے نہ ہونے کے باوجود ایران اور سعودی عرب ایسے تنازعوں کو ختم کرنے کے لیے مل کر کام کر سکتے ہیں۔
انھوں نے یہ بھی کہا کہ ایران جوہری ہتھیار لے جانے کی صلاحیت رکھنے والے بیلسٹک میزائل کو ڈیزائن نہیں کر رہا ہے۔سعودی عرب ایران پر الزام عائد کرتا ہے کہ وہ یمن میں حوثی باغیوں کی مدد کر رہا ہے جس کی ایران سختی سے تردید کرتا آیا ہے۔
سعودی عرب نے اپنی اتحادیوں کے ساتھ مل کر تقریباً دو برس پہلے یمن میں باغیوں کے خلاف کارروائیوں کا آغاز کیا تھا تاہم اب بھی یمن کے کئی علاقوں پر باغیوں کا قبضہ برقرار ہے۔یمن کے معاملے پر ایران اور سعودی عرب کے تعلقات میں کشیدگی سے پہلے ہی شام کی صورتحال پر دونوں ممالک کے تعلقات تلخ ہو چکے تھے۔
چند ماہ پہلے سعودی عرب کی فوج کے ایک ترجمان کا کہنا تھا کہ یہ وقت ہے کہ مشرق وسطیٰ میں ایک نئی حکمت عملی اپنائی جائے تاکہ ایران کا رویہ تبدیل ہو سکے کیونکہ عراق، شام اور یمن جیسے ممالک میں ایران کی مداخلت اور عزائم بڑا خطرہ ہیں۔