وزیر اعلیٰ بلوچستان میر عبدالقدوس بزنجو نے کہاہے کہ تاریخ میں پہلی مرتبہ چیئرمین سینیٹ کے عہدے پر کسی بلوچستانی کی کامیابی کسی معجزے سے کم نہیں لیکن افسوس اس بات کا ہے کہ اس کامیابی میں قوم پرستی اور صوبے کے حقوق کا دعویٰ کرنے والےاسلام آباد میں بے نقاب ہو گئے۔
وزیراعلیٰ بلوچستان کا کہنا تھا کہ صادق سنجرانی کی کامیابی نے ناصرف بلوچستان میں ان بڑے بتوں کو گرا دیا ہے جوہمیشہ سے بلوچستان کے مسائل اور یہاں کے عوام کی محرومیوں پر بلوچستان میں آکر تو مگر مچھ کے آنسوں بہاتے تھے مگر اسلام آباد کے ایوانوں میں ان کے منہ سے آواز تک نہ نکلتی تھی۔
انہوں نے مزید کہا کہ آج انہیں اقتدار سے نوازنے والی پنجاب کی سیاسی جماعت کی شکست نے غم سے نڈھال کردیا ہے ،انہوں نے ناصرف مگرمچھ کے آنسو بہائے بلکہ ان اداروں پر تنقیدکرتے رہے جو استحکام پاکستان کی علامت ہیں ۔
ان کا کہنا تھا کہ کل تک پنجاب کو مورد الزام ٹھہرانے والے آج بلوچستان کے لوگوں کوبھی اپنی بدلتی سیاست میں ڈھالنے کی کوشش کررہے ہیں ۔
عبدالقدوس بزنجو نے مزید کہا کہ بلوچستان کے عوام ان قوم پرست جماعتوں کی اصلیت جان چکے ہیں اور آئندہ آنے والے انتخابات میں بھی باشعور عوام انہیں آئینہ دکھا دیں گے۔
انہوں نے امید ظاہر کی ہےکہ نومنتخب چیئرمین سینیٹ صادق سنجرانی بلوچستان کے عوام کے مفادات اور حقوق کا تحفظ کرینگے ۔