فلور ملز مالکان کا کہنا ہے کہ گندم وافر ہے مستقل برآمدی پالیسی کا اعلان کیا جائےجبکہ اس سال رمضان پیکیج میں آٹے پر سبسڈی نہ دی جائے کیونکہ کروڑوں روپے کرپشن کا خدشہ ہےاور سبسڈی براہ راست کم آمدنی والے افراد کو دیں امیروں کو دینے کا کیا فائدہ۔
فلو ملز مالکان نے گندم کی نئی فصل کو شاندار قرادیا اور فوری طور پر آٹے کی قیمتوں میں 40 روپے تھیلا کمی کا اعلان بھی کیا ہے۔
لاہور میں میڈیا سے گفتگو کرتے ہوئے سابق چیئرمین پاکستان فلور ملز ایسوسی ایشن خلیق ارشد اور دیگر فلور ملز مالکان کا کہنا تھا رواں سال گندم کی پیداوار ڈھائی کروڑ ٹن کے لگ بھگ ہےجس کے بعد کسانوں کو پوری قیمت ملنی چاہئے جبکہ افغانستان کوگندم برآمد نہیں کی جارہی اس پر بھی غور کیا جائے۔
فلور ملز مالکان کا کہنا تھا کہ محکمہ خوراک کے سرکاری ذخائر کی حالت بہتر بنائی جائے تاکہ معیاری گندم عوام کو مل سکے جبکہ ملک میں نئی فلور ملوں کے قیام پر فوری پابندی لگائی جائےتاہم اس سال گندم وافر ہے اسے ذخیرہ کرنے کے لئے اسٹوریجز کی حالت بہتر بنائی جائے ورنہ گندم کا ضیاع نہیں رکے گا ۔