قومی اسمبلی کی مختلف جماعتوں کے ارکان نے چیئرمین نیب کو مشترکہ خط تحریر کیا ہے، خط پراحسن اقبال، اسد محمود، رانا ثناءاللہ، شاہد خاقان عباسی،شازیہ مری اور نوید قمر کے دستخط ہیں۔
خط کے متن میں کہا گیا ہے کہ متنازعہ، غیرمنصفانہ اقدامات پاکستان میں جمہوری عمل کومتاثر وکمزور کررہے ہیں،حزب اختلاف پختہ یقین پرکاربند ہے کہ کوئی شخص قانون سے بالاتر نہیں،حزب اختلاف ملک میں احتساب کے عمل کی مکمل حمایت کرتی ہے۔
خط میں کہا گیا ہے کہ غیرمنطقی، یکطرفہ، متعصبانہ احتساب کا عمل صرف اپوزیشن ارکان پر نظر آرہا ہے، ایسا عمل پارلیمان کی خودمختاری اور بالادستی کے لئے خطرہ بن جاتا ہے، نیب کے حالیہ اقدامات اور عوامی بیانات سے اس ادارے کی غیرجانبداری اور شفافیت پر تحفظات پیدا ہوئے ہیں، احتساب کا عمل اسلامی تعلیمات، پاکستان کے آئین، قانون، انصاف کے اصولوں پر ہونا چاہیے۔
خط میں حزب اختلاف کے ارکان کی جانب سے ملاقات کی خواہش کا اظہار کرتے ہوئے کہا گیا ہے کہ ملاقات میں آپ کو فوری نوعیت کی سنگین صورتحال سے آگاہ کریں گے۔