کراچی (عبدالماجد بھٹی/ اسٹاف رپورٹر) پاکستان کرکٹ ٹیم کے کپتان کی حیثیت سے سرفراز احمد کے مستقبل کا فیصلہ پاکستان کرکٹ بورڈ کے چیئرمین احسان مانی کو کرنا ہے جس کا انہیں استحقاق حاصل ہے۔ جنوبی افریقا کے خلاف سیریز کے بقیہ چار میچوں کے نتائج اور شعیب ملک کی انفرادی کارکردگی سے یہ فیصلہ ہوگا کہ آسٹریلیا اور انگلینڈ کے خلاف ون ڈے سیریز اور مئی میں ہونے والے ورلڈ کپ میں پاکستان کی قیادت کون کرے گا۔ کپتان سرفراز احمد پر لگنے والی پابندی اور چوتھے ون ڈے میں پاکستانی ٹیم کی با آسانی جیت کے بعد سرفراز کو کپتانی سے ہٹانے اور ٹیم سے ڈراپ کرنے کےلئے سابق اور موجودہ کرکٹرز متحرک ہوگئے ہیں۔ شعیب ملک کو ورلڈ کپ تک کپتان بنانے کی قیاس آرائیاں اس لئے زور پکڑ رہی ہیں کیوں کہ پی سی بی نے ابھی تک ورلڈ کپ کے لئے کپتان مقرر نہیں کیا ہے۔ تاہم ہیڈ کوچ مکی آرتھر اور چیف سلیکٹر انضمام الحق چاہتے ہیں کہ ورلڈ کپ میں سرفراز احمد ہی پاکستان کی کپتانی کریں۔ پی سی بی اس حساس معاملے پر کوئی تبصرہ کرنے سے گریز کررہا ہے ۔ ذرائع کا کہنا ہے کہ کپتان کی تقرری سیریز بائی سیریز ہوتی ہے۔نئی سیریز کیلیے کپتان کا تقرر کرنے سے قبل مکی آرتھر، انضمام الحق ،بورڈ آف گورنرز اور پی سی بی کرکٹ کمیٹی سے مشاروت کی جائے گی۔ سرفراز احمد جنوبی افریقی بیٹسمین اینڈی فیلکوایو پر قابل اعتراض جملہ کسنے کی پاداش میں چار میچز کی پابندی بھگت رہے ہیں۔
پی سی بی نے سرفراز احمد کو وطن واپس طلب کرکے کپتانی شعیب ملک کو سونپ دی ہے۔ چوتھے ون ڈے کے دوران جنوبی افریقا کے سابق کپتان گریم اسمتھ بھی شعیب ملک کی جارحانہ کپتانی کی تعریف کرتے رہے۔ گریم اسمتھ کا کہنا تھا کہ سر فراز احمد کے مقابلے میں شعیب ملک زیادہ متحرک دکھائی دے رہے ہیں ان کی فیلڈنگ اور بولنگ تبدیلی فرق پیدا کررہی ہے۔ جنگ کی تحقیق کے مطابق سرفراز احمد پر لگنے والی پابندی کے بعد سرفراز احمد کو کپتانی سے ہٹانے کے لئے لابنگ میں تیزی آگئی ہے۔ سرفراز احمد کے پرانے دوست اور ٹیسٹ فاسٹ بولر وہاب ریاض نے سوشل میڈیا پر پاکستانی کرکٹ ٹیم کی کارکردگی پر مبارک باد دی ہے اور شعیب ملک کی قائدانہ صلاحیتوں کی تعریف کی ہے۔ اسپاٹ فکسنگ میں سزا یافتہ سابق کپتان سلمان بٹ کا کہنا ہے کہ شعیب ملک تجربہ کار کھلاڑی اور کپتانی کی جگہ پر کرنے کے لئے بہترین چوائس ہیں۔ جوہانسبرگ میں چوتھے ون ڈے انٹر نیشنل کے دوران فاسٹ بولر محمد عامر بھی غیر معمولی جان لڑاتے ہوئے دکھائی دیے۔ کچھ اور کرکٹرز کی بھی باڈی لینگویج بھی تبدیل دکھائی دی۔ پاکستان کرکٹ ٹیم کی 8وکٹ سے جیت کے بعد سوشل میڈیا پر بھی شعیب ملک کو کپتان بنوانے کی مہم میں تیزی آگئی۔ جنگ کی تحقیق کے مطابق پاکستانی کرکٹ ٹیم نے سرفراز احمد کی قیادت میں 35ون ڈے انٹر نیشنل میچ کھیلے ہیں۔ 21جیتے13ہارے۔ جیت کا تناسب61 فیصد ہے۔ البتہ پاکستان ٹیم ٹی ٹوئنٹی میں نمبر ایک ہے۔ ٹی ٹوئینٹی میں پاکستان نے 33میں سے29میچ جیتے اور صرف چار ہارہے ہیں۔ کامیابی کا تناسب87.87 فیصد ہے۔ پاکستان کرکٹ میں کپتانوں کی اچانک تبدیلی کوئی نئی بات نہیں ہے۔