کئی طلبا ایسے ہیںجو اپنی تعلیم کےساتھ ساتھ ’سیلز پرسن‘ کی جاب بھی کررہے ہوتے ہیں،جس کا مقصد تعلیمی اخراجات پورے کرنا یا پھر اپنی مطلوبہ فیلڈ میں تجربہ حاصل کرنا ہوتا ہے۔ ایک اچھے سیلز پرسن کیلئے یہ آسان کام ہے لیکن اعلیٰ کارکردگی کیلئے اپنی صلاحیتوں میں مسلسل نکھار لایا جاتا ہے۔ اگر آپ اس میدان میں پہلی بار کودے ہیں یا بنیادی باتیںجاننا چاہتے ہیںتو اس کیلئے سیلز کے ماہرین کامیاب سیلز پرسن بننے کیلئے درج ذیل مشوروں سے نوازتے ہیں۔
آغاز ایک مقصد کے ساتھ
اگر آپ سیلز کا کام سیکھنا چاہتے ہیں تو اپنا ہدف متعین کریںاور اس کے حصول کیلئے اپنی کارکردگی جانیں۔ یہ معلوم کرنے کی کوشش کریںکہ آپ کو یا آپ کی کمپنی کو کتنے صارفین کی ضرورت ہے اور اس کا ٹائم فریم کیا ہے۔ آپ کتنے رابطے قائم یا استوار کرسکتے ہیں اور آپ کو ان سے کتنے مواقعحاصل ہو سکتے ہیں۔ جس ریونیو کا ہدف آپ کو دیا گیاہے، اس کے حوالے سے اپنے صارفین کو اپنی کمپنی کی مصنوعات کی اوسط قیمت سے ضرب دیں اور اس ہدف تک پہنچنے کیلئے محنت کریں۔
اپنے ذاتی ہدف طے کرنے کو بھی یقینی بنائیں ۔ جو آپ کی کمپنی میں2فیصد سرفہرست سیلز پرسن ہوتے ہیں ، وہ اپنی توجہ ، کام کی مہارت ، تجربہ کے تسلسل اور کام کی انجام دہی پر عبور رکھتے ہیں۔ اس قسم کے سیلز پرسن میںجگہ بنانا اپنا ہدف بنائیں ۔ یہ آج یا کل نہیں ،لیکن ایک دن آئے گا کہ آپ بھی سرفہرست سیلز پرسن ہوںگے۔
سیلز پروسیس پر دھیان دیں
سیلز کی دنیا تیزی سے بدل رہی ہےلیکن بہت سی چیزیںوہی رہتی ہیں۔ صارفین حاصل کرنے کیلئے آپ کو ان کے ذہن میںاپنی پراڈکٹ کی ضرورت اور دلچسپی پیدا کرنی ہوگی۔ اگر آپ ہر سیلز پروسیس کو ایک ہی طرح لیںگے تو بھی اس کا کوئی فائدہ نہیں ہوگا۔ یاد رکھیں کہ ہر بزنس کی اپنی نوعیت ہوتی ہے، اسی لیے سب سے پہلے آپ کو اپنے منیجرز کے ساتھ بیٹھ کر کمپنی کے پروسیس کو سمجھنا ہوگا۔ اس کیلئے آپ کو اپنی پراڈکٹ کی پوزیشن، اس کی خصوصیا ت کو سامنے لانے کی حکمت عملی اور مثالی صارفین کی کھوج کو سیکھنا ہوگا۔
کاروباری مسائل کی نشاندہی
آ پ میںیہ سمجھنے کی اتنی قابلیت ہونی چاہیے کہ آپ کے متوقع کاروبار کے کیا مسائل ہو سکتے ہیں اور انہیں عام مسائل سے الگ کرنا بھی آپ کو آنا چاہئے۔ دراصل یہ مسائل آپ کی سیلز میںرکاوٹ بنتے ہیں۔ ایک حقیقی کاروبار میں مسائل ہر روز ایگزیکٹو آفس اور بورڈ روم میںزیر بحث آتے ہیں۔ یہ بجٹ کا بھی مسئلہ ہوسکتا ہے اور سیلز ٹیم میں افرادی قوت کی کمی کابھی یا ہوسکتا ہے کہ اس سے بھی بڑھ کر شایدکوئی اور مسئلہ ہو جس کی نشاندہی کرنا بہت ضروری ہوتی ہے۔
بحیثیت ایک سیلز پرسن آپ کو اپنا اعتماد قائم کرنے کی ضرورت ہوتی ہے۔ خریدار کو اعتماد درکار ہوتاہے کہ آپ ان کے مسائل کو سمجھتے ہیں اورانہیںحل کرسکتے ہیں لیکن یہ تعلق سیلز کے بعد ختم نہیںہونا چاہئے، آپ کو اخلاقی طور پر ایفائے عہد پورا کرنے کیلئے بعد میںبھی روابط قائم رکھنے ہیں۔ ایک بار جب آپ اپنی پراڈکٹ یا سروس کے ذریعے لوگوں کی ضروریات پوری کرنے میں کامیاب ہوجائیں گے تو آپ کے ہاتھ میں بہت سے مطمئن صارفین ہوں گے۔
ہرمرحلہ کی پیمائش
کسی بھی چیز کی پیمائش یا جانچ اس کی قدر کا اندازہ کرواتی ہے اور جو چیز قابل پیمائش ہو، اس میں بہتر ی کی گنجائش رہتی ہے۔ یادرکھیں ، ہدف طے کرنے کے بعد اس کو پانے کیلئے اپنی کارکردگی کو جذبے سے پرکھیں۔ مثلاً آج آپ نے کس شرح پر سیلز کی اور مہینے کے آخر میں یہ تعداد کہاںتک پہنچ سکتی ہے۔ کیا آپ کی سیلز کی وجہ سے صارفین پرادکٹ یا سروس کی طرف مائل ہورہے ہیں ؟ اگر نہیں، تو پھر کچھ بدلائو کی ضرورت ہے۔ مہینے کے آخرتک ہدف پورا کرنے کا انتظار نہ کریں، اس سےپہلے کرلیں تو یہ بہت بہتر ہوگا۔ اس سلسلے میں اپنے منیجر سے مدد لینے میںکوئی قباحت نہیں ہونی چاہئے۔
صحیح خریدار کی تلاش
بہت سے سیلز پرسن ان لوگوں کے انتظا ر میں گھنٹوںبیٹھے رہتے ہیں،جو ان سے بات نہیںکرنا چاہتے لیکن برسوں کے تجربے کےبعد آپ اس قابل ہوجاتے ہیںکہ وہ لوگ آپ سے بات کریںاور آپ کی بات سننا چاہیں۔ اسے اِن بائونڈ مارکیٹنگ (inbound marketing)کہتے ہیںاور یہی اس کی طاقت ہے۔ لوگوں کے کام آنے والا اعلیٰ، معیار ی اور مدد گار کانٹینٹ آپ کے امکانات بڑھا دیتاہے ۔ اس سے آپ کا وقت بھی بچتا ہے اور آپ اپنی سیلز کو بھی مکمل کرلیتے ہیں۔