پاکستان کے نامور گلوکار علی سیٹھی نے اپنی بہن اداکارہ میرا سیٹھی کی شادی کی تقریب میں مشہور غزلوں اور گیت گا کر محفل میں رنگ جما دیا۔
علی سیٹھی نے ’آج جانے کی ضد نہ کرو‘ اور دیگر مشہور گیت گا کر تقریب کو یادگار بنایا۔
میرا کی شادی کی تقریب میں علی سیٹھی کی گائیکی نے مہمانوں کو خوب محظوظ کیا۔ غزلوں سمیت مختلف گانوں پر دلہن کے علاوہ مہمانوں نے بھی رقص کیا اور لطف اندوز ہوئے۔
یہ بھی پڑھیے: نجم سیٹھی کی بیٹی کا سوشل میڈیا پر اپنی منگنی کا اعلان
واضح رہے کہ اداکارہ میرا سیٹھی گزشتہ روز اپنے بچپن کے دوست بلال صدیقی سے رشتۂ ازدواج میں منسلک ہو گئیں۔
میرا سیٹھی نے اپنی شادی کی تقریب میں گلابی رنگ کا لباس زیب تن کیا جبکہ ان کے شوہر بلال صدیقی نے کریم رنگ کی شیروانی اور لال رنگ کا دوپٹہ لیا ہوا تھا۔
شادی جیسے خاص دن کے لیے میرا نے بہت زیادہ سج دھج کے بجائے گلابی لہنگے کے ساتھ اصلی پھولوں کا بنا ہار پہنا۔
نکاح کی تقریب میں بھی میرا نے سادگی کو ملحوظ خاطر رکھا۔
نامور ہدایت کار، ماڈل اور اداکار عدنان ملک نے اپنے انسٹاگرام اکاؤنٹ پر میرا سیٹھی اور بلال صدیقی کی شادی کی تقریبات کی تصویریں اپلوڈ کرتے ہوئے شادی کی مبارکباد دی ۔
یاد رہے کہ میرا سیٹھی نے گزشتہ سال اپنے مداحوں کو انسٹا گرام پر یہ بتایا تھا کہ انہوں نے اپنی زندگی کا ہمسفر چن لیا ہے۔ خوبصورت تصاویر اپ لوڈ کرنے کے علاوہ میرا نے دلچسپ انداز میں اپنی اور بلال کی ملاقات کے بارے میں بھی بتایا تھا۔
خوبصورت پیغام میں میرا سیٹھی نے لکھا کہ بلال اس حیثیت سے ان کی زندگی میں 2017 کے موسم بہار میں داخل ہوئے۔ گویا کہ وہ اپنے منگیتر بلال کو بچپن سے ہی جانتی تھیں، جو کہ پرانے فیملی فرینڈ کے بیٹے ہیں لیکن یہ جاننا ایسا ہی تھا جیسے کہ آپ اپنے والدین کے پرانے دوستوں کے بچوں کو جانتے ہیں۔
2008 میں دونوں آکسفورڈ یونیورسٹی میں زیر تعلیم بھی رہے لیکن اس کے باوجود ان کے درمیان کوئی خاص دوستی نہیں تھی۔
میرا نے منگیتر کی خیال رکھنے والی طبیعت سے متعلق لکھا تھا کہ بلال کے ساتھ لزبن، برسلز، ایمسٹرڈم، نیویارک، اسلام آباد، رینو، سان فرانسسکو تک کا سفر کیا۔ اس دوران صحرا میں بلال کے ساتھ بائیک پر بیٹھی تو انہوں نے بار بار مڑ کر پوچھا کہ تم ٹھیک ہو۔۔ ٹھنڈ تو نہیں لگ رہی۔
اپنے طویل نوٹ میں میرا سیٹھی نے یہ بھی لکھا کہ میرا بھائی علی سیٹھی اور پالتو کتا میکس بھی بلال کو بہت پسند کرتے ہیں۔
یاد رہے کہ میراسیٹھی سابق چیئرمین پی سی بی نجم سیٹھی اورپنجاب اسمبلی میں آزاد حیثیت سے منتخب ہونے والی جگنومحسن کی باصلاحیت بیٹی اور اداکارہ ہونے کے ساتھ ساتھ فکشن رائٹر بھی ہیں۔ اس کے علاوہ ڈیبیو فلم ’سات دن محبت ان ‘ سے فلمی دنیا میں بھی قدم رکھ چکی ہیں۔