کورونا سے اموات کی شرح1اعشاریہ 4فیصد ہے، ڈاکٹر ظفر مرزا

April 07, 2020

وزیراعظم عمران خان کے معاون خصوصی ڈاکٹر ظفر مرزا نے کہا ہے کہ پاکستان میں کورونا وائرس سے اموات کی شرح 1 اعشاریہ 4 فیصد ہے۔

اسلام آباد میں وفاقی وزیر اسد عمر کے ہمراہ میڈیا بریفنگ میں ڈاکٹر ظفر مرزا نے کہا کہ کورونا وائرس کی ٹیسٹنگ کی موجودہ صلاحیت 6 ہزار 500 ہے۔

انہوں نے مزید کہا کہ آئندہ چند روز میں کورونا ٹیسٹ کی یومیہ صلاحیت 20 ہزار تک لےجائیں گے۔

وزیراعظم کے معاون خصوصی نے یہ بھی کہا کہ ملک میں اس وقت 18 لیبارٹریز ہیں جو کوروناوائرس کے پی سی آر ٹیسٹ کرسکتی ہیں۔

ان کا کہنا تھا کہ مستقبل میں لیبارٹریز کی تعداد 32 اور پھر 40 تک لےجائیں گے، جلد ملک میں کورونا کی ٹیسٹنگ کٹس ملین کی تعداد میں دستیاب ہوں گی۔

ڈاکٹر ظفر مرزا نے کہا کہ ملک میں مصدقہ کیسز کی تعداد 3 ہزار 436 ہے جن میں سے بڑی تعداد ریکوری کے مرحلے میں ہے۔

انہوں نے کہا کہ پاکستان میں ا ب تک 54 افراد انتقال کرچکے ہیں جبکہ 28 مریض آئی سی یو میں ہیں۔