بھارتی فلم انڈسٹری کے شہنشاہ امیتابھ بچن کی جانب سے عید الاضحی کے موقع پر تمام مسلمانوں کو عید کی مبارک باد دی گئی ہے۔
بالی ووڈ کے سپر اسٹار امیتابھ بچن نےعید الاضحی کے موقع پر ایک روز قبل دنیا بھر کے تمام مسلمانوں کے لیے سوشل میڈیا پر مبارک باد کا پیغام جاری کیا ہے۔
سماجی رابطے کی ویب سائٹ ٹوئٹر پر امیتابھ بچن نے ایک تصویر شیئر کی ہے جس پر ’عید الاضحی مبارک‘ لکھا ہوا ہے جبکہ اس تصویر کے ساتھ ہی اپنے ٹوئٹ میں بھی انہوں نے ’عید الاضحی مبارک‘ لکھا ہے۔
سپر اسٹار امیتابھ بچن کی جانب سے یہ ٹوئٹ گزشتہ شب کی گئی تھی جسے اب تک اُن کے ہزاروں مداح لائیک کرچکے ہیں جبکہ اس پر تبصروں کا سلسلہ بھی جاری ہے۔
دوسری جانب فوٹو اور ویڈیو شیئرنگ ایپ انسٹاگرام پر بھی امیتابھ بچن نے یہی تصویر شیئر کی ہے جس پر ’عید الاضحی مبارک‘ لکھا ہے جبکہ اپنی پوسٹ کے کیپشن میں بھی اداکار نے لکھا ہے کہ ’عید الاضحی مبارک۔‘
امیتابھ کی جانب سے انسٹاگرام پر یہ پوسٹ 12 گھنٹے قبل شیئر کی گئی تھی جسے اب تک تقریباً 2 لاکھ 50 ہزار مداح لائیک کرچکے ہیں۔
واضح رہے امیتابھ بچن تمام مسلمانوں کو عید، عید الاضحی اور عید میلاد النبی ﷺ کی مبارک باد دینا کبھی نہیں بھولتے، گزشتہ برس بھی انہوں نےعید اور عیدمیلادالنبیﷺ کی بھرپور انداز میں مبارکباد دی تھی۔