کراچی (نیوز ڈیسک) محققین نے انکشاف کیا ہے کہ وہ ایک ایسے نوزل اسپرے (ناک کے اسپرے) کی تیاری پر کام کررہے ہیں جس کے ذریعے سے کورونا وائرس کو کنٹرول کیا جاسکے گا۔ ایک طرف تو دنیا بھر میں کورونا وائرس میں اضافے کا سلسلہ جاری ہے تو وہیں دوسری طرف وائرس پر قابو پانے کیلئے محققین مختلف ذرائع ڈھونڈ رہے ہیں۔ اب سائنسدانوں نے دوا جیسے ایک مالیکیول پر ابتدائی کام شروع کردیا ہے جو کہ نوزل کے ذریعے سے انسانی خلیوں سے مل کر انسان کے جسم میں موجود قدرتی قوت مدافعت کو حرکت میں لے آئے گا جو کورونا وائرس کے پھیلائو کو روکنے کا ذریعہ بنے گا۔ ویکسین کے ذریعے سے جب قوت مدافعت حرکت میں آتی ہے تو اس س میں اینٹی باڈیز اور ٹی سیلز پیدا ہوتے ہیں جو کہ مخصوص بیماریوں کی طرف راغب ہوتے ہیں تاہم قدرتی طور پر موجود مدافعانہ نظام بڑے پیمانے پر جرثوموں کیخلاف کام کرتا ہے۔ برطانوی اخبار سے گفتگو کرتے ہوئے امپیریل کالج لندن میں وزیٹنگ پروفیسر اور آسٹریلوی بائیوٹیک کمپنی کے ایڈوائزر رابرٹو سولاری کا کہنا ہے کہ یہ ایک طرح سے حفاظتی شیلڈ کا کام کرتا ہے جو کہ براڈ اسپیکٹرم (جراثیم کی بہت ساری اقسام کیخلاف بااثر) اور نان اسپیسفک (غیر واضح جراثیم) کیخلاف بااثر ہوتا ہے۔