فلم انڈسٹری کے بڑے نام پیسوں سے زیادہ آج کل فلم کی کہانی کو مدنظر رکھتے ہوئے اس میں کام کرنے یا نہ کرنے کا فیصلہ کرتے ہیں لیکن بالی وڈ کے سینئر اداکار انیل کپور نے ایک وقت میں ایسا نہیں کیا تھا اور انہوں نے کچھ فلموں میں صرف پیسوں کی خاطر کام کیا۔
100 سے زائد فلموں میں اداکاری کرنے والے انیل کپور نے ایک انٹرویو میں بتایا کہ کچھ فلموں میں کام صرف پیسوں کے لئے کیا جس میں ’انداز‘ اور’ ہیر رانجھا‘ شامل ہے اور اسکا کوئی افسوس نہیں۔ اگر قسمت بدلی اور دوبارہ برا وقت آیا تو میں اپنے اہلخانہ کی خاطر کچھ بھی کرنے کے لئے ذرا سا بھی نہیں سوچوں گا اور کچھ بھی کرلوں گا۔
انہوں نے کہا کہ میں اور میری فیملی خوش قسمت ہے کہ برا وقت گزر گیا اور ماضی جیسے مشکل حالات اب نہیں ہیں۔
انیل کپور نے مزید کہا کہ مجھے نہیں لگتا کہ میں نے کبھی بھی فلم انڈسٹری کو گھر کے علاوہ کسی اور چیز کے طور پر دیکھا۔ میں اسی میں اپنی آخری سانس لوں گا۔