کراچی کے گلبائی پل پر آج صبح گاڑی پر کی گئی فائرنگ کے حوالے سے ڈی آئی جی ساؤتھ زون جاوید اکبر کا کہنا ہے کہ جس گاڑی پر فائرنگ ہوئی اس میں 2 غیر ملکی موجود تھے، زخمی ہونے والا غیر ملکی کسی سرکاری ادارے کے منصوبے سے منسلک نہیں تھا۔
میڈیا سے گفتگو کرتے ہوئے ڈی آئی جی ساؤتھ زون جاوید اکبرنے بتایا کہ گاڑی ڈیفنس سے نکلی جو شیر شاہ میں واقع فیکٹری جا رہی تھی۔
انہوں نے بتایا کہ گاڑی پر فائرنگ کا اصل مقام جاننے کی کوشش کر رہے ہیں، دونوں غیر ملکیوں میں سے 1 کو گولی لگی جس کی حالت خطرے سے باہر ہے۔
ڈی آئی جی ساؤتھ جاوید اکبر کا مزید کہنا ہے کہ زخمی چینی شہری کسی سرکاری ادارے کے منصوبے سے منسلک نہیں تھا۔
انہوں نے یہ بھی بتایا کہ غیر ملکی شیر شاہ میں واقع فیکٹری میں مشینوں کی تنصیب کے لیے جا رہے تھے، واقعے سے متعلق مزید معلومات اکٹھی کی جا رہی ہیں۔